出唔到咀之後......

（上回講到……）

尋日本應要行 20K，但結果只係行咗 15K，所以班「仔」係咁討論今日點樣可以行埋剩番嗰 15K，例如話「之」字型咁行路😅。其實領袖最着緊嘅係佢哋嘅唔係距離，而係佢哋點樣去實踐佢哋嘅 plan，所以喺佢哋出發之前，領就畀咗十五分鐘時間佢哋去熟習今日嘅路線，希望佢哋真係可準備得好啲啦。

等緊班「仔」煮早餐時，享受一下有少少霧氣嘅赤徑美景：

雲都好靚。

早餐煮好嘞：

食完早餐，study 過今日要行嘅路，九點三嘞，要出發喇！

動身前，影張大合照先。

青年旅舍嘅服務對象同以前有啲唔同。

碼頭上嘅人，似乎係尋晚喺附近過夜嘅露營人士，佢哋大部份都唔係講廣東話嘅。

行到近赤徑村嘅小碼頭

通常都要喺呢度影張咁樣嘅合照。

行上北潭凹途中，回望東心淇，呢個景，一流。

十點半左右，行到北潭凹，小休一陣。
見到有唔少非廣東話人士喺度等的士，唔知佢哋跟住會去邊呢？

搵吓跟住嘅路係點行先！

呢個指示牌，我記得我小六時跟幼童軍去嶂上露營嗰陣已經有。

今日嘅路簡單過尋日咁多（即係冇咁崎嶇），梗係要做吓圖針練習啦，就度下蚺蛇尖、鹽田仔（當時似乎誤認為橋咀）、牛耳石山的方位角啦，然後判斷一下自己位置啦。

不過，大家狀態不佳，不如只係考驗大家量度前置方位角，然後坐低大休時先至慢慢搵（當時嘅）自己位置啦。

上去牛耳石山途中都可以見到有幾棵吊鐘。

差唔多上到牛耳石山頂，又要休一休。我就趁機影吓塔門、高流灣、蚺蛇尖。

十二點八，繼續行啦，嶂上豆腐花等緊大家。

急步走到最前，預備影吓各位嘅英姿。

一點七，終於上到大家最期待嘅大休地方：嶂上嘅許林士多。

等緊買豆腐花、餐蛋麵嘅時候，見到呢篇唔知乜雜誌嘅郊區士多報道。

許林士多，喺由我小六幼童軍嚟呢度露營嘅時候已經認識，今時今日仲喺度服務登山客。

我嘅午餐

再食埋Ｌ幫我哋領袖買嘅即食飯，飽晒！

啱啱喺上緊牛耳石山未完成嘅地圖事工，現在要完成埋佢喇。

大概都叫做喺地圖畫得出我哋當時喺邊嘅😅。

我哋名副其實真係「大休」，我哋到三點先至離開許林士多，沿嶂上郊遊徑落山。

嶂上郊遊徑，好好行。
如果冇咗班「仔」嘅聲音，可以聽到腳踏枯葉嘅清脆聲音。

嶂上郊遊徑，似乎水土流失頗為嚴重，好多樹根露晒出嚟。

去年我上咗個漁護署搞嘅水道工作坊，實習嘅地方係嶂上郊遊徑比較近海下路嘅地方。如果我冇認錯，以下幾張相就係呢個工作坊嘅義工做過嘢嘅地方。

有一個「仔」可能衣著唔係咁合適，焗到有些少暈，未落到海下路就已經週不時要抖。Ｓ借咗件渣馬Ｔ畀佢替換。喺呢個時候，收到另一隊喺 WhatsApp 發送過嚟嘅「追踪符號」：

「我已回家」

我哋去到嗰個「我已回家」嘅符號時，已經差唔多四點半。

我哋原本係應該齊齊行到黃石碼頭先至解散，但係啱啱嗰個行到暈暈地嘅「仔」行到搖吓搖吓咁，我哋驚佢頂唔順，要搵另外兩個「仔」扶佢行。

結果，我哋喺近大灘嗰度就等巴士離開，兩個小隊各自搭巴士返到西貢解散。

今次嘅 30K 遠足旅程，班「仔」準備未算係好足夠，再加上佢哋經驗又唔係好多，30K 嘅路程最終只係行咗 25K 咗右。希望班「仔」能夠喺今次失敗當中汲取經驗，做好準備，搵機會挑戰埋出長咀嘅旅程。