（嘗試）帶「仔」出咀

對上一次去長咀，應該係差唔多十五年前帶四個「仔」入去露營。今年，一班童軍即將要衝「總領袖」，佢哋需要行一趟 30K 嘅兩日一夜徒步郊外遠足旅程，帶「仔」出咀呢個念頭就喺我腦海浮現出嚟，而多位領袖亦都同意；就係咁，我哋就引導咗班「仔」計劃咗呢趟旅程。

今時今日，入西貢郊區係要有心理準備要同人逼，所以我係 book 定咗赤徑 YHA，以及吩咐班「仔」要一早出發；我甚至擔心新年期間會好多人入西灣，所以包咗一架西灣村巴，一齊入去。好在，去到西貢西灣村巴站頭，都唔算係好多人。

出發前檢查裝備

起行喇！

見到後面有好幾架的士，係因為其實當時係有唔少人 call 咗的士預備離開西灣。所以，西灣唔係唔多人去，而係佢哋都係喺前一晚入咗嚟，朝早就走。

我哋呢個廿一人團，有八位領袖，十三個「仔」。
話係「仔」，其實係女仔多過男仔。

除咗 77KR，仲有 61KR 同 54STSD 嘅「仔」同領袖同行。

呢度以前係農地嚟㗎。

入到西灣，見到個海，個個都好興奮。

舐犢情深

西灣附近都有吊鐘，不過當然唔及大枕蓋咁茂盛。

我自己唔算係好耐未入過嚟大浪灣，不過每次見到呢隻 Snoopy lying on the sea，都係好開心。

鹹田灣，唔知尋晚係唔係咁寧靜嘅呢？

未到十二點就到鹹田，但大家已經喺度開餐。

喺鹹田見到呢個嘢，算唔算係香港旅遊業興旺嘅指標？🙈

出咀，就要離開麥理浩徑，入大灣。

（大灣３６０原片）

（大灣３６０後製片）

要搵路過去東灣喇。

望住碧綠嘅海，心曠神貽！

不過，由大灣過去東灣嘅路，對於班「仔」嚟講，一啲都唔容易。

費盡九牛二虎之力，落到東灣，兩點三有多。

領袖相討之後，覺得班「仔」應付唔到出咀兼且日落前回程去赤徑嘅路，所以我哋 cut route，只係要求佢哋搵路上去預備出咀嘅路就算。

我自己留咗喺東灣 chill 一陣。

不過，我冇諗過會 chill 成個鐘😟。聽到佢哋嘅聲音，以及見到佢哋蹤影，已經係四點三。

同佢哋匯合之後，我哋要嗱嗱林離開東灣喇。

兩隊人揀咗唔同嘅路去赤徑。我跟嘅呢隊，嚟到呢個位置，已經係六點三，差唔多日落嘞；而另一隊仲喺鹹田。

預備上大浪坳之際，見到個咁嘅嘢。我未夠一年前先嚟過呢度，唔覺有件咁嘅嘢㗎喎？

上到大浪坳，天已經黑齊。

七點零八分，見到呢個牌。

加油呀，就快到喇！

七點十三分，到赤徑碼頭喇！

噢，有個咁嘅牌？

咁夜嚟到營地，即刻煮飯啦！

大家都攰喇，早啲休息啦😪！（雖然班「仔」到咗十一點幾仲未瞓。）

同場加映：正月初五的月光（晚上七點卅六分拍攝，其實八點幾個月光已經落到見唔到）。

（未完待續）