| 特訓日 | 第一日 | 第二日 |
凌晨十二點半起身，一點鐘食早餐，試過未？
 |
| 友仔好合作，話要起身就起身。睇嚟佢今次登山係好有決心。 |
 |
| 呢度嘅早餐係麵包。同我六年前上山嗰次啲飯嚟比，呢款早餐比較適合友仔胃口。 |
食完早餐，我哋隨即出發。同尋日一樣，各人以自己嘅步速上山，我就當然要繼續同友仔一齊啦。不過我個心有啲戰戰兢兢：半夜上山人多，好驚同友仔走失；為咗令我可以分辨到云云人海中友仔喺邊度，我特登帶咗顏色燈仔同額外嘅反光帶畀友仔同我自己。不過，就算係咁，我都 要打醒十二分精神，唔好畀友仔離開我視線半步。
兩點四左右，嚟到登頂前最高嘅山屋：「御来光館」，位置叫做「八合五勺」。
 |
| 不忘燒印仔。 |
上山人多，再加上海拔高，我哋行得好慢，友仔亦周不時要抖。
九合目前嘅一個鳥居，差幾十米就到，友仔都要坐低抖下。呢個時候，快腳嘅已經去到十合目，等御來光。
友仔基本上係五步一抖咁滯，轉個彎行十幾米，都用咗超過五分鐘。
上到十合目，我隨即帶友仔入去屋仔休息。我打算去匯合其他團員去睇御來光，但友仔可能太攰喇，唔願意走出戶外。
咦，似乎有機會睇到御來光喎。
 |
| 感恩！今次上富士山頂睇到御來光！ |
 |
| 快腳團員，加埋尋晚遇到嘅香港家庭，佢哋一早就霸到靚位睇御來光。 |
 |
| Ｋ，你好叻仔呀！咁快就可以上到嚟！ |
睇完御來光，我同友仔歎吓熱朱古力。
吖，要去曉印喎。
 |
| 喺「久須志神社」個印唔係燒，係打上去嘅。 |
 |
| 陰功，友仔攰到眼腫腫咁。 |
 |
| 咦？呢個位置今次都可以燒印？仲要係 ¥500 燒兩個？ |
我哋喺呢度搞呢搞路，六點二繼續行去真正嘅山頂「剣ヶ峰」，海拔 3776 米。
我哋沿住火山口行，呢一刻天都陰晒。
冇幾耐，個天又光番，諗住同友仔影張火山口相，但陽光掁到友仔雙眼打唔開。
呢度嘅沙同石都係紅紅地。
咦，呢個位影火山口 OK 喎。
 |
| 好掁眼呀！ |
繼續向前行，「剣ヶ峰」就喺眼前。
喺排緊隊嘅時候，其他童軍兄弟姊妹同友仔講嘢，令到友仔醒晒！😆
 |
| 呢一刻，一世都記住！ |
六年前登頂嗰次（當日遊記），因為「剣ヶ峰」後面啲路有冰，冇得環繞火山口行一個圈；今次好好彩，我哋有得繞山一周！😃
九點二，我哋兜完火山口一個圈，要瀡落山喇😣。
上次嘅遊記我有講過，我唔會想行第二次富士山，其中一個原因係落山好辛苦；如果今次唔係話諗住三個老竇帶自己嘅仔一齊上富士山，我真係唔會想再行。不過，既然嚟咗，點都要落埋山㗎啦。我都知道友仔唔會鍾意行呢啲路，希望佢頂得住啦。
 |
| 要多得呢啲 bulldozer，山屋上面先至可以有咁多物資，同埋大家可以喺山頂寄明信片。 |
 |
| 如果唔係有Ｎ同Ｋ一路同友仔講嘢，友仔係唔會喺我前面咁多。 |
 |
| 呢個位置，一定要睇清楚自己要去邊。我哋係要行番去吉田口嘅。 |
 |
| 行行吓，友仔跟唔切其他童軍兄弟姊妹咯，我同佢慢慢落山啦。 |
 |
| 原來喺男廁嗰邊嘅坐廁，對用家嚟講係有特別要求㗎😆！ |
幾乎成路落山路都係望住呢個景。
 |
| 我哋行落山，到底之字形咁轉過幾多次彎？ |
13:35，終於行晒啲碎石路！本來，我同友仔對行山鞋係唔同色嘅，但呢一刻，兩對鞋都係紅紅地嘅火山灰顏色！
我哋第二日嘅行蹤記錄（未行番到五合目手錶已經冇電🙈）：
雖然我講過唔想再行富士山，但今次可以友爸友仔兩父子一齊完成一件事，點都係珍貴嘅。不過，下一樣一齊完成嘅事，唔好再係行富士山喇。
| 特訓日 | 第一日 | 第二日 |
No comments:
Post a Comment