友爸友仔齊登富士山：特訓日

特訓日

第一日

第二日

話說，友爸與一眾學校童軍兄弟喺六年前一齊沿吉田路線上富士山，友仔友媽當時只係上到五合目，只有五歲嘅友仔當日只能行多一小段就折返（當日遊記）。我估計，自此友仔就一直將登富士山成為佢嘅目標之一，但礙於疫情，莫講話富士山，就連離開香港都難。估唔到，當疫情過去，Ｓ同Ｌ問我呢個暑假一齊帶埋自己個仔上山，我見有咁嘅機會，梗係應承啦！不過，要帶埋小朋友登山，大人同小朋友都要有足夠訓練，所以Ｌ就約埋我一齊帶埋自己個仔行蚺蛇尖，當係練長途、練體能同埋試行路況惡劣嘅山路。

Ｙ今年唔上富士山，但多謝佢陪埋我哋一齊照顧兩位小朋友。
可惜今日Ｓ唔得閒吖。

小Ｌ比友仔細三個月，但因為常跟老竇一齊玩，體能唔錯嘅。友仔嘅體能都係 OK 嘅，但就唔鍾意啲石屎路、風景一般嘅路，無奈要去睇到靚景之前，都一定要行經呢啲地方；早幾日試過約其他打算一齊上富士山嘅朋友一齊由東涌行上鳳凰山，友仔未上到昂平就已經係咁放負，結果去到昂平就走，所以我都擔心佢能唔能夠登頂。不過今日可能冇早幾日咁熱，兩個小朋友似乎行得唔錯。（又或者，可能今日有伴一齊，冇咁悶？）

友仔上石屎梯級嘅時候，都真係會大墮後嘅。

不過，當我哋過咗大灣，開始行崎嶇山路時，友仔精神番，兩個小朋友仲比我哋大人行得爽添！睇吓下面兩張相，搵唔搵到兩位小朋友喺邊度？

無他，呢度風景咁正！

真係「莫欺少年窮」，喺我哋差唔多登頂嘅時候，見到有個可能比友仔大兩三年嘅男仔，佢仲話佢細佬（同友仔差唔多大）已經一支箭咁上咗去！

四個登頂的少年

喺友仔仲細嘅時候，友媽就周不時話想試下同友仔喺唔同嘅三角網測站打咭，蚺蛇尖自然就成為目標之一。今日，目標達成！

大人都打個咭先！

不過，風景最靚係向住北脊嘅方向。

落山，都唔係容易㗎，不過我哋都順利嘅，兩位小朋友唔會比大人輸蝕㗎。

去到赤徑，搭大飛走。今日特訓成功！

唔知上富士山，友仔掂唔掂呢？

特訓日

第一日

第二日