友爸友仔齊登富士山：第一日

特訓日

第一日

第二日

 終於到咗友爸友仔一齊登富士山嘅日子！

好可惜，小Ｌ嚟到東京就水土不服，唔能夠一齊登山😟。希望佢喺酒店可以好好休息，之後嘅行程可以健健康康咁去享受啦。

計埋友爸友仔，今次一齊沿吉田路線上山嘅，一共有十二人，幾乎全部都係童軍兄弟姊妹。我比較熟悉嘅，就係自己學校嘅童軍兄弟，其中Ｌ、Ｓ、Ｎ係六年前都有一齊登山，另外仲有Ｓ嘅仔仔小Ｓ，以及即將升中五嘅Ｋ。

今日天氣唔錯，希望我哋順利登山！

友宅向來少主動話影相，多謝Ｌ幫我哋影咗唔少相。

同後面嘅銅像似唔似樣？

十點二左右，喺登山紀念木牌打今日個印仔。
富士登山，正式由吉田口五合目開始！

由於各人能力不同，我哋講好咗要按自己嘅步速上山；開始嘅路段唔係友仔嘅專長，所以係行得比較慢；而小Ｓ係年紀最細嘅，亦唔會跟住其他大人咁嘅步速。冇幾耐，我哋已經係各分開晒咁行。

友仔最大嘅原動力，可能就係要上山頂，同埋要喺支「金剛棒」上面燒印仔，所以雖然辛苦，友仔都係不斷堅持嘅，幾乎冇聽過佢放負👍。

友仔六年前好似同友媽最盡行到呢個位置。

行咗一個鐘左右，到六合目。

食個午餐先。

食完午餐，默默堅持上山。

友仔呢個年紀（十一歲）上富士山，係唔係太細？梗係唔係啦，你睇，有一班相信係日本幼童軍上緊山，聽佢哋講，佢哋得六、七歲，仲要係由年紀大過我嘅人帶佢哋上嚟！

我哋同呢批小朋友一齊行咗一小段路。

我哋同呢班小朋友雖然步速接近，但有時候都會拉得比較開，所以有唔少時候都係比較孤單。

見到山屋喇，加油！

13:05，嚟到七合目，第一間山屋「花小屋」，有得燒印仔喇！

呢度有個好奇怪嘅告示：

喺度抖咗十幾分鐘，先至將支金剛棒拎去燒印仔。

燒完，即刻繼續上山！

終於有一啲對於友仔嚟講比較好玩嘅路：

七合目一帶啲山屋比較接近，幾分鐘後就行到「日の出館」：

呢度向山下望，風景都好唔錯。

哇，下面間屋好多人預備上嚟，要行喇！

行多十分鐘左右，到咗「七合目トモエ館」：

Hiro 哥哥啲英文講得好好。

呢度家下嘅氣溫仲係幾舒服。

燒完印仔，繼續上路。

由七合目開始，路上見到唔少火山岩石。

友仔呢支金剛棒上面支旗係登山路線。
就快到下一間山屋喇，攤開張路線圖睇下係叫乜名？

14:05，到咗「鎌岩館」。手錶所量度到嘅高度同個牌展示嘅相差 26 米，都算凖啩。

喺呢度休息咗一陣，又見番剛才遇到過嘅日本幼童軍。

打個咭，繼續行，下一個係⋯⋯

⋯⋯行多十分鐘就到嘅「富士一館」。

快快趣趣燒埋個印，繼續上路。

下一間山屋相對冇之前咁密有一間。喺友仔坐低休息期間，再次見番班日本幼童軍。

大概兩點九，下一間山屋就快到喇。

到「鳥居莊」。現在手錶量度得到嘅高度同個牌展示嘅相差 60 米。

我哋上到同啲雲差唔多高度，望落山下面係白茫茫一片。

快快趣趣燒埋印仔，下一間山屋好近呀。

行十分鐘左右，到「東洋館」喇。

嚟到呢度，追得番同行嘅童軍兄弟姊妹，可以有人幫我哋揸機影合照。😃

只要你捨得畀錢，帶唔夠嘢食都唔會餓親。

家下陽光多番啲。

燒完印仔，抖十分鐘左右，繼續行。

不過下一間山屋冇咁近喇，友仔要抖好幾輪。

四點二左右，即係行咗八個字有多，終於見到下一間山屋喺面前。

到「太子館」，八合目喇！海拔係 3100 米，友仔可能已經有高山反應；好在Ｌ喺東京買定咗啲氧氣，每個大人都有份，我畀友仔吸啖先。

以往嘅旅行，我過海拔 3000 米就會有高山反應；但今次可能因為我要用友仔嘅步速上山，我就適應得幾好。睇下，我仲笑得出！

喺「太子館」食埋嘢，燒埋印仔，休息夠，先繼續上路；始終過咗海拔 3000 米，同埋山屋冇喺下面啲咁密，一定唔可以急。

接近四點半，起行！

下一間山屋係「蓬莱館」。

友仔要燒印仔嘅話，就要自己畀錢。

我哋喺度抖五分鐘左右就繼續上。雖然休息係需要，但都盡量唔好咁夜先去到我哋喺本八合目嘅山屋住宿。

跟住嘅山屋又係比較疏，友仔需要周不時抖吓。

呢度維修山徑，都應該幾辛苦。

五點七，到咗「白雲莊」。

呢度，凍喇。

五點九，要行喇，試吓唔駛開頭燈上到住宿嗰間山屋啦。

五點十一，到海拔 3250 米嘅「元祖室」喇。

友仔打晒喊露。

而我仲有精神，真難得！

影張靚仔少少㗎啦！

六點一，行喇，下間屋就係㗎喇（雖然仲有啲距離），友仔加油呀！

時間係有少少緊嘅，因為天色開始暗喇。

我估我隻錶所量度嘅高度係低咗唔少。

喺呢度，我哋遇到一對講國語嘅一男一女，女嘅行得有啲辛苦。佢望到友仔，大叫「我看到自己啊」，因為佢件外套同友仔嗰件一樣係熒光黃色！

仲有，喺呢度我哋見到一對香港夫婦帶住一仔一女上山！大仔大概好似友仔咁大，細女好似話係七、八歲，嗰個老竇話，佢哋係第二次上嚟富士山！幾年前老竇係孭住細女上山！強呀！

好勁嘅香港家庭！

今日嘅終點在望喇！

六點八，到咗我哋預訂咗嘅「本八合目トモエ館」喇！

吩咐友仔嗱嗱淋同友媽報到先！

快快趣趣燒埋個印仔，跟住入屋休息。

除咗Ｓ同小Ｓ之外，同團嘅人全部已經到齊。咦，Ｋ嘅？原來佢同另一位快腳嘅早我哋幾個鐘有多就到，佢哋已經食咗飯去瞓覺。真係「莫欺少年窮」！

後來得知，Ｓ同小Ｓ七點多啲去到「太子館」。佢哋會喺「太子館」留宿一晚。

喺本八合目，仲有另一間山屋「上江戸屋」，不過友仔冇精神去呢度燒印仔咯。

佢寧願去瞓覺。啱嘅，我哋仲要半夜十二點上山㗎。

我哋九點幾都去瞓喇。呢間房我哋團嘅童軍兄弟瞓晒。

中過 COVID 嘅，都會收到呢件「血氧儀」。啱喇，今次帶埋嚟量度一下大家嘅血氧量先。哇，我得 78% 咋！😣

我哋第一日嘅登山記錄：

特訓日

第一日

第二日