友仔令和元年遊日本︰第十五日

第一日

第二日

第三日

第四日

第五日

第六日

第七日

第八日

第九日

第十日

第十一日

第十二日

第十三日

第十四日

第十五日

第十五日嘅相簿

最後一朝，好好享受

「難得可以喺咁大、咁舒服嘅旅館瞓一晚，梗係要瞓晏啲！」呢個係友媽嘅諗法。

「難得可以喺農村地方過一晚，梗係要早啲起身出去行吓！」呢個係友爸嘅諗法。

所以，友媽仲瞓緊嗰陣，我就已經走咗出去喇；不過，我哋有個私家溫泉咁正，出去之前梗係浸多次先啦！噉喺我出去嘅時候，友仔呢？我嘅估計，佢應該會早醒過友媽，跟住自己喺度搵嘢睇、搵嘢玩😆！

畀兩張 360 照片大家睇吓我哋旅館外面嘅環境先啦！

翠綠嘅農田，種嘅似乎係稻米。

嗰啲白色嘅煙，係溫泉嘅水蒸汽，定係早晨嘅炊煙呢？

路旁邊有一條河，不過河床好似生咗好多植物。

呢個咁有趣嘅告示牌講乜嘅呢？

某個農場養咗馬︰

呢啲鄉村地方，有農田之餘，仲有汽車、火車，我細個時睇過嘅日劇有見過呢啲靚景㗎。

影呢張 360 相時，有架車喺我後面行過添！

過咗九點半喇， 友媽都應該起咗身喇啩？都應該要返旅館喇。

我哋十一點先至要 check out，但因為我哋想爭取多啲時間喺由布院行吓，我哋執齊嘢，十點左右就離開。

喺離開旅館之際，我見到有紅色嘅火車即將駛到由布院︰呢個係我好鍾意嘅景，所以一定要影低佢（雖然，我嘅攝影技術麻麻）。

點解香港啲渠蓋唔可以好似呢度噉整得咁靚呢？

喺鄉郊地方嘅平交路，又係我好鍾意嘅景。

呢架車有乜咁特別？尋日我哋出入旅館嗰陣，見到有兩個人喺度砌緊呢架車；今朝就見到砌好咗嘞。

啱啱嗰架紅色火車。

我哋去到火車站，未到十點半，我哋買咗 12:09 嘅「由布院之森」火車飛，仲有個半鐘，可以做啲乜呢？

火車站嘅遊客資訊中心有得租單車踩，友媽諗住我帶條友去踩單車。

不過呢，呢啲單車高度唔啱友仔喇，結果友仔就跟友媽啦，我就租咗架單車，短遊由布院。

友媽同友仔去邊呢？友媽話，佢哋入咗呢度睇嘢。

前面呢架就係我租嘅單車。

但友仔係唔會鍾意 shopping 呢類活動㗎，佢做乜呢，就係⋯⋯

⋯⋯睇書囉😆！

而我，就踩足一個鐘頭，行番我哋四年前行過嘅地方。

咦？有馬車喎。

再臨天祖神社。

金鱗湖。

金鱗湖 360。

租車時間仲有大概十分鐘，踩番去旅館嗰頭先。

踩到番火車站，啱啱一個鐘！

友仔都唔係成個鐘頭匿喺嗰間舖頭度睇書，友媽後來帶咗佢去巴士總站附近一個可以浸腳嘅地方，溫泉水嚟㗎！

還咗單車，拎番行李，買啲凍嘢飲，噉就完咗我哋嘅由布院之旅。

ゆふいんの森

四年前嚟由布院，來回都坐咗「ゆふいんの森」（由布院之森），呢架火車太靚喇，所以今次再坐一次，雖然今次唔係有啲乜嘢火車證，而係特登買飛嘅。

上車喇！再見由布院！

由布院之森，真係好靚。

開車喇，友仔友媽坐得幾開心！

我即刻去餐卡買便當，排晒長龍呀！我買嘅便當同汽水都係用「由布院之森」命名。

出面風景幾靚～

火車嚟到呢條叫做「慈恩の滝」嘅瀑布，就會特登行慢啲，畀大家欣賞呢條瀑布，不過要影相就難好多嘞。

由布院之森最正嘅地方，就係車頭車尾可以畀乘客睇到駕駛室同前面嘅情況。

哇，前面路軌有啲恐怖！

坐靚火車，就梗係要拎個牌影吓相啦。咦？原來由布院之森已經有三十年㗎喇？

吖⋯⋯我記得上次有一個有日期嘅牌畀我哋影相㗎，今次冇嘅？

原來，今次乘務員姐姐係分兩次嚟。

兩點四左右，火車嚟到福岡。個個都同佢影相。

令和元年遊日本，到尾聲喇

我哋要坐六點三嘅飛機返香港，時間唔算好趕，但福岡我哋都冇乜地方諗住行喇，索性即刻搭地鐵去機場。

喺由布院天氣唔係太熱，但係返到福岡呢⋯⋯攝氏 35 度呀！

其實我哋早去到機場係明智嘅，因為機場好多人，排咗大半個鐘先可以順利將行李寄艙。

我哋坐嘅係廉航，冇飛機餐食，所以要喺機場食埋飯先。不過，五點鐘咁早，食晚餐⋯⋯🙄

最慘係︰飛機有延誤，因為飛機遲咗由香港飛嚟福岡。

好在飛機都唔算延遲好耐，七點鬆啲就飛得。令和元年遊日本，就此完結。

今次旅行，撞啱香港有反修例風波；我哋離開香港十五日，雖然大致上都好享受，但都冇法子唔睇香港嘅新聞。

返到香港，迎接我哋嘅係行雷閃電，象徵我哋要再面對香港嘅暴政。