NL MK: 友仔令和元年遊日本︰第十一日

第一日	第二日	第三日	第四日	第五日
第六日	第七日	第八日	第九日	第十日
第十一日	第十二日	第十三日	第十四日	第十五日

第十一日嘅相簿

行街兼 shopping

當我哋定好晒呢次旅行嘅日程嘅時候，就已經定咗今日係 shopping day，因為身邊有好多朋友都話︰去日本就應該要行吓 Mont-bell 嘅 outlet，而我又搵到松山嘅 Mont-bell 係公共交通可以去到嘅；睇過自己想去嘅地方，排吓日程，噉就定咗今日去 Mont-bell。

初頭我諗住友媽都會一齊去，不過今朝佢話佢想自己行吓其他地方，所以就只有我帶住友仔去 Mont-bell。

尋晚我哋睇煙花，夜瞓，所以我哋今朝好晏起身，十一點左右先出門口。

雖然係公共交通可達，但係巴士班次好疏，一個鐘頭一班。
值得一提︰四國火車證係唔包乘搭伊予鐵公司嘅巴士。

十一點半左右上車，十一點十落車。

由巴士站行去 Mont-bell outlet，中間經過呢間餐廳。
我最初擔心友仔嘅午餐唔知點解決，但當我見到呢間嘢，我就知道︰搞掂嘞！

到 Mont-bell outlet 喇。
喺烈日底下，雖然只係行咗五分鐘，但都咪話唔辛苦。

呢間 Mont-bell outlet 有兩層樓，但其實只係樓上賣平貨，樓下基本上可以當係普通 Mont-bell 舖頭🙄。

「太陽能電筒」⋯⋯吖唔係，應該係「太陽能頭燈帽」。

我喺呢度行咗差唔多兩個鐘，但只係買咗一件減咗價嘅褸；友媽托我幫友仔搵嘅衫就搵唔到喇。喺呢兩個鐘，友仔點樣消遣呢？佢帶咗一本佢鍾意睇嘅書，匿埋喺一個紮咗出嚟做 demo 嘅營入面睇書囉😆。

行完 Mont-bell，我哋就去友仔嘅至愛「CoCo 壱番屋」食兒童咖哩餐。

呢度啲餐同香港嗰啲唔係好同。

食完，係時候搵友仔幫我計要畀幾多錢喇。

我同友仔去咗 Mont-bell，友媽去咗邊呢？佢話佢喺網上睇到松山市郊嘅古泉有一個大型商場「emifull MASAKI」，所以佢嘅目的地就係嗰度。

友媽話，佢坐郊外電車去古泉站，完全唔需要搵路；佢見到一批着住校服嘅女仔向住同一方向行，於是佢都跟埋一份，結果真係冇去錯。

我同友仔食完飯，下一站就係搵番友媽，一齊行商場。

呢個商場同友媽鍾意嘅 Aeon Mall 有得比。

我一帶友仔入去個商場，佢就即刻畀啲 TOMICA 火車玩具展品吸引住😆！

友仔好明顯唔會咁容易走得甩，我就 call 友媽過嚟，等友仔睇到夠。不過，友仔都唔睇得耐，因為好快已經有職員收走呢啲玩具。

友媽話外面另一座 building 係賣電子產品嘅，建議我哋去睇，友媽就繼續喺度睇嘢。

其實我去都係得個睇字啫。友仔去做乜？門口有個釣魚玩具，佢同另一個當地小朋友一齊玩囉。