友仔令和元年遊日本︰第九日

第一日

第二日

第三日

第四日

第五日

第六日

第七日

第八日

第九日

第十日

第十一日

第十二日

第十三日

第十四日

第十五日

第九日嘅相簿

為咗坐觀光火車，籌劃行程傷腦筋！

決定去四國之後，我哋搵景點，無意中畀我搵到「伊予灘ものがたり」（伊予灘物語）呢種觀光火車！睇到人哋嘅遊記介紹，好正噉喎；就係噉，「伊予灘物語」就成為咗我哋今次旅行嘅重頭戲。

中文版預約網站話︰

由於伊予灘物語之觀光列車相當受歡迎，所以很難買到票。
此網站是為了讓外國人遊客有更大機會能搭乘到，才推出了在互聯網上的售票。
只接受【伊予灘物語】的座位和講究的用餐組套申請。

*在網站上購買時，除了乘車費用、用餐費以外，作為安排手續費我們將收取870円。
注意1 由於人氣相當高,所以搶不到票的情況較多。
注意2 不能與四國周遊券（ALL SHIKOKU Rail Pass）並用。敬請諒解！

呢個網站講得好啱，「伊予灘物語」真係好難預訂。我喺七月定行程嘅時候，本來諗住去完北九州就去別府，然後坐船去四國；噉樣嘅話，我哋搭八月二號嘅「道後編」就最 fit；七月五號半夜，我哋預訂呢一程，即日八點幾日本到咗辦公時間，就收到佢哋嘅電郵話我嘅預訂唔成功；我哋早四個禮拜㗎喇喎🙄！

七月五號放工後，我預訂八月三號嗰四班；後來諗諗下，八月三號係星期六，可能成功嘅機會仲渺茫，所以夜啲再試下八月二號嘅「八幡濱編」；結果畀我估中︰八月三日嗰四班都冇，好在我有補番預訂八月二號唧，呢一班就成功咗，不過呢一班係最貴嘅 (¥7630×2+¥6990=¥22250)，可能因為佢包埋嘅午餐比較貴啦。我哋預訂到呢程火車係比最初嘅計劃早，我哋嘅行程要有所修訂，因為我想充份使用我打算買嘅火車證。

預訂成功，畀咗錢之後，我就收到一個電郵，要印定出嚟，預早二十分鐘去到松山火車站攞飛。

由高松（香川縣）去松山（愛媛縣）

要搭「伊予灘物語」，我哋需要去松山；今日，我哋就要告別高松喇。

觀光火車喺 13:28 開出，但我哋要早二十分鐘去攞飛，而且我諗住去到先要去預訂咗嘅民宿放低行李（冇理由帶埋篋上觀光火車啩），我計過，我哋要坐九點八由高松去松山嘅火車。

今日我哋行入高松火車站，先至留意到入口嘅玻璃係裝飾到成個笑面噉樣。😃

四國係冇新幹線嘅，不過我哋坐呢架火車，坐喺入面都有坐喺新幹線嘅感覺。

呢程火車唔係觀光火車，不過我都坐得好開心。

唔係友媽講起，我都唔知喺四國有唔少地方係出名食烏冬。喺呢程火車經過嘅一啲車站，我有啲似曾相識，可能就係同烏冬有關。

日本，邊度都有蒸汽火車。

哇，海天一色呀！

我哋十二點三左右去到松山火車站。睇住窗外面靚靚嘅風景，唔係好覺得坐咗兩個幾鐘火車。

咦？我哋唔係住喺火車站附近咩？

喺松山嘅住宿，我係透過 Airbnb 搵嘅。火車去到松山嘅時間，本來民宿仲未可以畀我哋 check in 嘅，不過尋日問過屋主，佢話我哋可以喺十二點左右就上去放低行李，噉我哋就可以慳番寄存行李嘅費用。

即使係噉，我哋喺松山落火車，第一件事都係去睇吓有冇得寄存行李，因為去到一個陌生地方，拎住行李搵路係幾辛苦嘅事。可惜嘅係，松山火車站嘅寄存行李服務只係去到五點半，我哋坐完「伊予灘物語」應該趕唔切返嚟。好在我哋尋日有去問可唔可以事先將行李放喺民宿。

為咗唔想喺轉住宿地方嘅時候搬行李用太長時間，我好多時搵住宿都係想喺火車站附近。Airbnb 介紹松山嘅住宿係「9 min walk to Matsuyama-shi Sta. 5 min by Taxi.」，我諗住好容易就行到去啦，臨離開火車站嘅時候用手機喺 Google Maps 搵條路線，哇，點解係 2.1 公里，要行 28 分鐘嘅😱？唔多對路！雖然有成個鐘頭啫，但係都嚟唔切行去再返嚟㗎！我哋嗱嗱淋去截的士，呢次係我哋咁多次去日本旅行第一次搭的士。

友仔第一次喺日本坐的士，好似好興奮噉樣。

當我將民宿個地址畀的士司機睇嘅時候，佢表現到唔係好知喺邊噉，睇嚟我都係要開住個 Google Maps 睇佢點行。

的士用咗大概十分鐘由火車站行到去民宿，可能因為我心急，同埋沿途有好多燈位，我覺得的士行得好慢。

因為民宿嘅位置睇嚟唔容易截的士，同埋我驚趕唔切返火車站，我叫的士司機等埋我將行李攞上民宿之後載番我哋去火車站。呢程的士，車費成 ¥2000 㗎💸。不過，如果我哋可以寄存行李，需要嘅費用可能差唔多。

點解民宿離火車站咁遠嘅？睇真啲 Airbnb 屋主嘅介紹，同埋睇番松山嘅地圖，原來民宿屋主話嘅「九分鐘步程」係用「松山市駅」(Matsuyama-shi Sta.)，而唔係「松山駅」(Matsuyama Sta.)；我心目中嘅「火車站」應該係「松山駅」，而「松山市駅」原來係松山市入面嘅「伊予鉄道」（伊予鐵），類似香港嘅輕鐵；而「松山市駅」係比較接近松山市中心，「松山駅」（或者我應該叫佢做「JR 松山駅」）就冇咁多街行。

如果我早啲搞清楚呢個分別，我今日就唔駛咁騰雞。好在，坐的士之後，時間仲係鬆動嘅。

伊予灘物語

返到「JR 松山駅」，未夠一點，趕得切去攞飛有餘。

攞飛嘅位置係「綠色窗口」。
我知道頭等車係叫「綠色車廂」(Green Car)，但佢呢個窗口都唔係綠色嘅？

車票套嘅相唔關「伊予灘物語」事，而係另一架喺四國嘅觀光火車。
不過，佢咁靚，都值得影低留念。

三個人啫，車飛咁大疊嘅？係因為每人有三張飛︰一般用嚟畀稽查查嘅車飛、頭等車飛、同埋係家下見到嘅餐券。

時間仲有多，參觀一下呢個「JR 松山駅」先。

聽聞松山係愛媛縣最大城市，但呢個火車站仲係比較舊。
我其實係讚㗎，家下好少火車站仲可以保持得古色古香。
睇吓，佢係用正體「驛」字㗎！

日本已經有好多火車站都係用電子閘機，但呢個站仲係用人手檢查車飛。

因為同名，所以締結。

又係麵包超人！

喺呢個站，兩列火車係可以停喺同一條路軌😱。

一點三未到，已經見到我哋要坐嘅「伊予灘物語」喇！

1 號車廂「茜の章」。

2 號車廂「黄金の章」。

我哋坐嘅係 2 號車廂。睇番官方網頁，兩個車廂佈置同座位都有啲分別，不過我訂位嘅時候係冇得揀嘅。

哇，上落車嘅時候，月台上面車門位置係會鋪地氈㗎！

叔叔清潔完車廂，我哋上得車喇！

我哋坐喺向山嗰邊嘅座位。我哋上車嘅時候，每個位嘅枱面已經有一個「愛媛柑」、一個文件夾同埋一把扇。

我哋嘅午餐餐牌︰

13:28，準時開車！同其他我哋見過嘅觀光火車一樣，所有車站職員會同車上面嘅乘客揮手道別。

開咗車，我哋枱面越來越多嘢︰

上菜喇！第一道係「トマトコンソメスープ　紅茶の香り」，Google Translate 話係「蕃茄湯」，幾好味，友仔好鍾意。

跟住就係便當。

友仔食得好滋味噉喎︰

食到咁上下，火車嚟到海邊。坐喺向海嗰邊嘅乘客就正喇︰

火車嚟到一個叫「下灘」嘅火車站停咗一陣，畀乘客落車影相。

火車站附近有間美容店？

例牌會有人夾道歡迎。

鮮紅色嘅「伊予灘物語」，配合萬里無雲嘅藍天碧海，真係好靚。

不過，真係好曬囉！
原來今年係「伊予灘物語」五周年。

曬到乘務員都要擔番把遮。

太曬喇，都係返上車涼吓冷氣，順便影吓車廂入面嘅環境。

呢隻我估係愛媛縣嘅吉祥物，友媽叫佢做「柑 bear」。

我哋坐嗰卡「黄金の章」。
原來乘務員會喺大家落晒車影相嘅時候，將未食完嘅便當用保鮮紙包住。服務體貼到呢！

前面嗰卡「茜の章」。

友仔都趁呢個時候享用咗個愛媛柑。好味！

火車離開下灘，繼續前進。海景真係靚到絕！

嚟到呢個地方，火車仲特登慢慢行，畀我哋影相添！

食完午餐，有咖啡飲。

友仔唔飲得咖啡，就有杯橙汁。

食完嘢，乘務員當然會清走枱面嘅嘢啦，不過呢一件嘢就畀我哋留為紀念。呢件好似用繩織成嘅嘢係乜嚟嘅呢？大家可以睇番之前啲相搵到答案。

杯墊都值得留念嘅。

火車喺喜多灘短暫停留，有乘客喺度落車。

我以為飲完咖啡就冇嘢食㗎啦，估唔到乘務員仲派咗粒「うすかわ饅頭」畀我哋︰

似乎係友仔鍾意嘅甜品喎。

終於等到呢個時間喇，就係乘務員拎個日子牌畀我哋影相。

呢個時候，火車已經駛入內陸，不過風景都係一流。

火車駛過五郎站，除咗有人同我哋打招呼，仲有啲有趣嘅擺設︰

哇，呢個係扮緊乜嘢😂？

火車去到伊予大洲站附近，終於係輪到近山呢邊有景睇︰大洲城。

嚟到伊予平野站，火車再停咗一陣，不過唔係上落客，而係運咗啲嘢食上嚟，似乎係為咗下一程「道後編」而設嘅下午茶。

我哋呢程「八幡濱編」就快到尾聲，乘務員畀咗啲卡仔我哋，話係請我哋寫一啲留言畀呢一帶嘅居民喎。

我臨時臨急上網搵出嚟嘅日本祝福語句，希望冇寫錯啦😆。

火車就快到終點站之前，經過一間屋，屋主抱住狗狗出嚟同我哋打招呼。

15:54，火車抵達終點站︰八幡浜（八幡濱）。大家落咗車之後，當然就梗係爭相同火車合照啦。

重返松山

坐完伊予灘物語，我哋需要返去松山。

返松山嘅火車，下一班係 16:34。

火車未咁快有，我哋參觀一下八幡浜駅（八幡濱站）。我哋遲兩日會再嚟呢度，家下順便熟習一下環境。

我哋將會再嚟呢度，係因為我哋嘅下一站係別府，喺呢度我哋可以坐船過去。

仲未夠鐘，我哋入咗去火車站嘅「七．十一」，睇吓愛媛縣有乜名產。似乎都係同柑有關，我哋又見到友媽叫嘅「柑 bear」。

返松山嘅火車到喇，我哋要走喇。

友仔今次應該好盡興，因為喺火車瞓着咗。

我以為我哋回程嘅時候都可以睇番剛才喺「伊予灘物語」嘅海景，但睇番我嘅 GPS，原來返松山嘅火車係行「山線」，而「伊予灘物語」係行「海線」，所以呢程火車唔算好多景睇🙄。

大概五點半，我哋返到松山。我事前喺網上睇過，知道我哋嘅四國火車證係包松山市伊予鐵（亦即係電車），所以我哋喺松山三日兩夜，基本上都可以唔駛畀錢噉搭車。

伊予鐵「JR 松山駅前」站

我哋由「JR 松山駅」行出去「JR 松山駅前」電車站嘅時候，友媽有發現︰

聽日電車延長服務，係因為聽日有煙花睇！

我哋要重新計劃一下聽日嘅行程喇。

根據民宿屋主嘅介紹，我哋係可以由「松山市駅」行九分鐘返去，所以我哋搭電車去「松山市駅」。去到「松山市駅」，大概六點，不過應該算係夜喇，而且民宿附近似乎冇乜食肆，我哋都係喺呢度買埋嘢食啦。電車站所在地有間「高島屋」百貨公司，我哋喺度買咗我哋嘅晚餐（便當），同埋聽日嘅早餐。

高島屋百貨公司，下面就係「松山市駅」。

日本人講究服務、包裝，但有時我會覺得佢哋太誇張。我買麵包做早餐，店員每個包同我分開袋，有啲包仲要用個膠盒入畀我，然後用一個大紙袋裝晒！

以後買嘢嘅時候，真係要記得先同店員講唔好用咁多袋先得！

我哋喺松山嘅住宿

我哋喺松山嘅民宿，係喺伊予鐵郊外電車軌隔離嘅一座舊住宅入面，冇電梯，本來亦冇浴室，友媽話睇得出佢係喺露台加建一個浴室出嚟。不過，我都預咗㗎喇，因為呢間民宿係比較平。其實，除咗舊啲之外，室內環境都算係幾舒服嘅；唯一有度唔好嘅，就係唔知點解呢舊 WiFi AP 唔係好掂囉🙄，我用咗好多時間同屋主溝通都唔係好解決得到。

我哋事前計劃松山行程嘅時候，睇到呢個 blog 講去瀨戶內海踩單車；本來我哋係諗住聽日去，不過友媽話佢唔識踩單車，話只係我帶友仔去，但啱啱我哋又睇到聽晚有煙花睇喎，如果日頭去踩單車，夜晚友仔有冇精神去睇煙花呢。唉，睇吓聽日幾點起到身再算啦！