友仔令和元年遊日本︰第一日

第一日

第二日

第三日

第四日

第五日

第六日

第七日

第八日

第九日

第十日

第十一日

第十二日

第十三日

第十四日

第十五日

第一日嘅相簿

點解又去日本？

話說，三月初，友仔一家參加咗香港礦山挑戰賽 2019，贏到呢個獎︰

其中一個獎品係︰日・本・機・票！

所以，友仔一家今個暑假有得去日本旅行。

主辦機構贊助得我哋免費機票，我哋係有嘢要做到畀佢嘅，就係要探索同馬鞍山鐵礦有淵源嘅日本製鐵工業嘞。當然，要履行任務之餘，我哋真係有得周圍去玩嘅。

早機去⋯⋯😴

同小朋友去旅行，如果畀我買機票，就會諗住小朋友可以正常時間噉起身去搭飛機；不過今次機票唔係我買，我哋只可以揀日子。結果，我哋嘅飛機係朝早七點半，即係話，友仔係要四點幾起身！好在，得到友媽提點，佢四點半係真係起到身嘅。

坐緊車去機場時，天仲未光呀……😴

五點九到機場，我哋 check in 嘅櫃位已經排晒長龍︰

好在，一切順利，友仔又合作，我哋可以輕鬆噉入到登機閘口，打個咭︰

友仔手上拎住嘅係贊助我哋去日本嘅機構——鞍山探索館——嘅吉祥物，佢叫做「小饅」。

福岡到着

據鞍山探索館提供嘅資料，我哋需要探索嘅製鐵工業歷史係喺北九州，所以我哋揀咗福岡做今次日本旅行嘅起點同終點⋯⋯呃，其實我哋係可以揀其他地方做起點同終點嘅，不過鞍山探索館同我哋訂機票時，我哋都冇乜計劃要去邊度😅，所以就當我哋係去九州旅行啦，自不然就揀咗福岡做起點同終點。

日本時間大概十二點，我哋抵達福岡機場，友媽見到一架好得意嘅飛機︰

我哋坐嘅係廉航，飛機冇得食，友仔出到接機大堂就即刻要醫肚。好在七仔嘅麵，友仔都鍾意食。

因為我哋係第二次嚟到福岡，我對於機場對外交通已經有了解，而且我哋訂咗嘅住宿要到三點先有得 check in，所以我哋可以輕鬆啲喺機場 hea 下。

今次，我哋安排咗友仔要拎番自己行李，友仔又好合作喎👍。

我哋唔識揸車，搵住宿一定要係交通方便。我搵到一個喺東比恵地鐵站（喺機場搭一個地鐵站）附近嘅 apartment，好似唔錯喎︰

友媽最重要係有得洗衫。呢度合晒佢心意啦！

Apartment 好在兩點就有得畀我哋 check in。放低行李之後，友爸友媽要去醫肚喇，喺機場度只係得友仔食咗嘢。

Apartment 附近好靜，只係得呢間食肆有開門。

好傳統。

好食！

食完麵，已經三點幾。福岡最大嘅火車站——博多駅——就喺附近，我哋就去嗰度啦。

順便，換埋我喺香港事先買定嘅火車證。

JR 山陽、山陰、北部九州七天周遊券，大人要 ¥22000，友仔半價。

我哋要履行嘅任務，大部份都喺北九州市，原則上北部九州周遊券就啱用。不過，我哋喺出發前兩星期左右先至決定去埋四國玩，一程喺北九州坐去四國嘅新幹線火車已經要超過 ¥11000；諗過度過，都係買呢款最適合。當然，我哋要真係喺北九州市坐得夠多次火車先會抵番啦，我諗⋯⋯我哋得啩😅。

由於我哋今朝係半夜四點就起身，我哋唔想友仔太攰，我哋淨係喺博多駅嘅商場行一陣，就買咗幾個便當，拎番 apartment 食。

食完飯，我哋叫友仔快啲去沖涼瞓覺，但係鍾意睇書嘅佢，點都要睇一陣書先。😆

去日本旅行，友爸友媽注定會肥，因為我哋總會去便利店買啲嘢飲嘢食做宵夜。喺香港冇呢啲嘢食嘛！

聽日，我哋嘅任務就要開始。我哋都要早啲瞓！