| 第一日 | 第二日 | 第三日 | 第四日 | 第五日 |
| 第六日 | 第七日 | 第八日 | 第九日 | 第十日 |
| 第十一日 | 第十二日 | 第十三日 | 第十四日 | 第十五日 |
 |
| 第二日嘅相簿 |
南下大牟田
由鞍山探索館畀我哋嘅資料，得知同馬鞍山鐵礦有關嘅製鐵公司係冇得開放畀我哋睇嘅😅。不過日本喺明治時代工業發達，當時同工業有關嘅建築物，好多都有妥善保存，甚至成為世界文化遺產，而同馬鞍山鐵礦有關嘅製鐵公司係其中之一。鞍山探索館鼓勵我哋去發掘我哋可以參觀嘅日本工業遺產，我哋參考過佢提供嘅資料，決定將大牟田嘅煤礦遺蹟納入我哋嘅景點之一。
喺 apartment 食完尋日喺便利店買定嘅飯糰早餐之後，我哋去大牟田。
由博多去大牟田，可以用得張火車證盡啲嘅方法，就係先坐一程新幹線去筑後船小屋，然後坐區間車去大牟田。
 |
| 用得九州嘅火車證，新幹線嗰程就梗係坐指定席啦。 |
呢架車嘅窗簾幾靚喎。
筑後船小屋，似乎係鄉下地方，冇人嘅？
嚟呢個地方有乜嘢好做呢？入去普通火車嘅站入面睇會有部份答案。
 |
| 浸溫泉？ |
區間火車嚟嘞⋯⋯其實好似地鐵噉啫，但友仔都好感興趣。
嚟到大牟田，一出火車就知道呢度同煤好有密切關係。
咦？仲有隻機械龍😆？
連個火車站名牌都有條龍喎︰
出咗火車站，見到呢度比起筑後船小屋多人一啲︰
開工︰睇礦坑遺址👷
根據大牟田の近代化産業遺産ホームページ網站嘅資料，我哋可以去參觀嘅地方有好多，不過全部都唔近，我哋冇可能去得晒；而且，呢度嘅交通工具資料有網上發佈出嚟嘅並唔多，我唔係咁清楚我哋點樣去呢啲地方，所以我其實都唔知去邊個好。
就喺我哋行出去火車站對出嘅巴士站時，見到有架巴士嚟到，好似係可以去到我哋其中一個景點「宮原坑」；我喺手機撳宮原坑嘅資料問司機，司機用佢有限嘅英文表示可以去得到，我哋就嗱嗱淋上車。
當巴士臨近「早鐘眼鏡橋」站嘅時候，好好人司機提我哋要落車，而且仲用佢有限嘅英文教埋我哋點行上去宮原坑。
其實，仲要行多七百米㗎。又熱又曬，咪話唔辛苦。
喺我哋行入去宮原坑嘅路途中，全程都見到以前運送煤礦嘅鐵路痕跡︰
到喇！
 |
| 好曬、好熱呀！ |
 |
| 小饅出場！ |
 |
| 上面有個集電弓嘅？ |
 |
| 原來係跟運送煤礦嘅電氣化火車做出嚟嘅。 |
我最初以為係純粹自己入去周圍行，原來入面係有工作人員解說㗎！我哋見到有三位工作人員，全部睇嚟都係已經退休嘅年紀。
工作人員畀咗幾把遮我哋遮太陽，好貼心！
招待我哋嘅伯伯係識講英文嘅。我同佢講話我哋係嚟了解日本嘅工業遺產嘅時候，佢就拎咗好多資料嚟同我詳細講解，仲有啲單張畀我帶走添！
由於我哋要交功課，我拍咗好多影片。其中，呢齣片係喺一個礦坑升降機房入面拍，招待我哋嘅伯伯解釋得好詳細。
宮原坑現時已經停止運作，不過因為呢度已經成為世界文化遺產，好多嘢都保存咗落嚟。
呢度真係好多嘢睇，不過我並唔能夠即刻明白，始終我哋要兼顧拍攝，而平日我又唔習慣拍片，同時間又要聽伯伯講嘢，個腦唔係好 function 到😅。
 |
| 運送煤礦嘅車斗 |
 |
| 運送煤礦嘅鐵路一帶嘅地圖 |
 |
| 呢個係升降機，可以落礦坑入面，不過現在加咗安全設施，避免參觀者跌落礦坑入面。 |
雖然友仔對機械嘢係有興趣，但係大熱天時佢都冇乜心機去睇，何況冇人用中文向佢解說呢。友媽就安排友仔喺「陰間」休息，呢個時候有一個姨姨同一個伯伯招呼佢，同佢玩😆。
 |
| 伯伯同佢影相，仲用手機即時將日文口語翻譯成中文同佢溝通。 |
 |
| 佢當正小饅係佢自己嘅公仔，仲同佢改咗個名叫做「Mr Bun」！ |
 |
| 有雪糕食，真開心！ |
其實呢度唔係淨係得個睇字，仲有紀念品賣㗎︰
 |
| 有Ｔ裇、鎖匙扣、糖、餅⋯⋯ |
 |
| 呢包好食，不過唔記得咗係乜嘞。 |
我哋同一直同我哋講解嘅伯伯合照︰
友仔同呢個伯伯玩得好開心︰
佢仲借咗啲礦工工具畀佢，叫佢扮小礦工😆。
我哋喺宮原坑逗留咗個幾鐘。招呼我哋嘅伯伯仲叫我哋去埋其他嘅礦坑同運煤出海嘅海港參觀，不過我哋邊有咁多時間吖？同埋繼續睇呢啲嘢，友仔一定會悶死。
我哋向伯伯、姨姨道別之後，就慢慢行番出去巴士站，搭車返火車站搵地方食晏。
大牟田火車站附近已經係最旺嘅地方，但食肆選擇好少，我哋好彩都搵到一間拉麵舖，友仔係啱食嘅︰
食完之後，就要去友仔有興趣嘅地方︰博物館喇！呢個博物館當然係同煤礦業有關㗎啦。
我哋又要搭巴士先至可以去到呢個博物館。等車地方，有一架舊電車放咗喺度，畀人參觀。
無聊搵啲嘢影下先。點解坑渠蓋都可以咁靚？
開工︰去博物館睇煤礦業資料
今次我哋坐嘅巴士係總站去總站。我哋落車嘅地方，唔係喺正博物館入口，而係 Aeon Mall！
友媽望到流晒口水，不過可惜我哋嘅目的地唔係商場而係博物館。
博物館都唔近㗎，我哋都行咗成十分鐘。
博物館對面係一所大學（帝京大學）︰
一直都淨係叫佢做「博物館」，我哋行到去先知道佢個名叫做「石炭産業科学館」。
咁僻嘅地方，有冇人嚟參觀嘅呢？
博物館入場費，大人 ¥410，兒童 ¥200，唔貴，但都幾多嘢睇；最重要係︰呢度入場嘅人少（唔係冇人嘅），友仔可以盡情噉睇！
 |
| 呢個係宮原坑升降機嘅模型，友仔玩過之後就好興奮噉講個操作原理，好似今朝聽過伯伯講解噉。 撳呢度睇下友仔有乜發現。 |
我個人覺得最正嘅係︰有一條模擬坑道，可以入去睇礦坑啲機器，有啲仲要係郁得嘅添！
呢條模擬坑道睇晒要用大概十分鐘，沿途有聲音導航，效果迫真；呢齣片，記得開聲睇︰
今朝雖然喺宮原坑有專人講解礦坑運作，但都係一知半解；入到嚟博物館睇到呢啲展品，明晒！
我拍咗呢齣片同呢齣片，講解兩個時代嘅機器運作。
雖然友仔好鍾意睇展品，不過，佢始終都係小朋友，鍾意玩火車玩具😅︰
點解友仔會鍾意喺呢個地方影相🙄？
我哋喺呢個博物館睇咗個半鐘。呃，未致於睇到博物館閂門嘅😅，四點鬆啲囉。
友媽放題⋯⋯一個鐘！
我哋預留咗六點半嗰班由筑後船小屋開去博多嘅新幹線，倒數番時間，我哋要六點離開大牟田，即係喺五點左右離開博物館呢頭。恭喜你呀，友媽，你可以行你期待嘅 Aeon Mall 呀！
友媽話︰得嗰半個鐘，邊度夠行呀？不過，好過冇啦。
後來，我再 check 下巴士班次。恭喜你呀友媽，因為五點七先至有巴士，你可以再行多半個鐘呀😆！
呢個商場又真係幾大嘅︰
友仔唔鍾意 shopping，所以我就要喺友媽行商場嘅時候睇住條友嘞。我哋做乜好呢？
 |
| 食刨冰！ |
 |
| 我都有份食嘅。 |
食完刨冰，仲有時間，做乜好呢？
 |
| 我冇畀錢佢打機呀，但佢悶到坐喺度齋睇住啲公仔郁都頂得住。 |
為咗要記低呢間 Aeon Mall 有幾大，我特登影咗呢張 360 相。
我哋五點半未到就走出去巴士站等車，友媽話︰未夠喉！
巴士好準時五點七開，五點九就返到火車站，仲有少少時間周圍睇吓嘢。我哋聽到啲「叮叮咚咚」聲，原來係有堆小朋友喺度玩樂器。
今晚係唔係有晚會呢？不過我哋已經預留咗新幹線飛返博多，唔睇咯。
臨去搭火車返筑後船小屋，我喺街見到個噉嘅嘢。有乜用嘅呢？
由於香港呢兩個月唔多妥，我一坐車就睇香港發生乜事。我，身在日本，心繫香港。
無心插柳
點解我哋一定要坐六點半嗰班新幹線呢？
話說，嚟日本之前，友媽喺網上留意到九州呢輪有米奇老鼠新幹線運行。我今朝喺博多坐新幹線去筑後船小屋時，手多多上網睇有關米奇老鼠新幹線嘅班次，咦，六點五十五分返到博多嗰班新幹線係喎！於是今朝我哋喺筑後船小屋嗰度預留咗呢程新幹線嘅指定席。我哋事前計劃旅行嗰陣，都冇特登為要坐米奇老鼠新幹線而做啲乜嘢，估唔到咁啱得咁橋有得坐！
友仔喺筑後船小屋新幹線站度等車時，見到米奇老鼠新幹線嚟到，就唔理我哋兩個，自己急步上咗車！
 |
| 友仔幾開心！ |
不過，除咗啲裝飾之外，我覺得呢架車其實冇乜咁特別😛。
呢班車仲有人推車仔賣米奇老鼠新幹線紀念品，我哋都有幫襯︰
賣紀念品嗰位姐姐講嘢好雞仔聲，唔知係唔係特登配合嘅呢？
呆等晚餐
返到博多，要解決嘅難題就係︰今晚餐飯點呢？
喺搵食嘅期間，友仔見到佢識我唔識嘅比卡超卡通人物，要影張相︰
我哋去咗火車站隔離嘅巴士總站大樓，搵到間鐵板燒︰
我同友媽見到就想食，就呢間啦。門口有兩、三個人坐喺度等緊位，我以為唔駛等好耐，點知店員已經同好幾個客登記咗！我哋喺度呆等咗半個鐘頭有多，友仔餓扁咗咯！
呆等之際，我無聊影下一個我喺香港成日去嘅地方︰紅十字會捐血站。
終於有位坐喇！但係叫咗嘢食，都仲係要等好耐。
餓緊嘅期間，得個睇字。
有得食喇！不過友仔好似唔係咁感興趣。
我哋唔覺意叫多咗。冇緊要啦，留番聽朝做早餐，橫掂走嘅時候都唔早喇。
行緊番去 apartment 期間，成日留意人哋有冇串錯字嘅我，留意到有嘢唔妥︰
嗯，夜喇，友仔快啲沖涼瞓覺，我哋仲要執嘢，聽日要轉去下一站︰門司區。
No comments:
Post a Comment