NL MK: 友仔令和元年遊日本︰第十三日

第一日	第二日	第三日	第四日	第五日
第六日	第七日	第八日	第九日	第十日
第十一日	第十二日	第十三日	第十四日	第十五日

第十三日嘅相簿

颱風，打到嚟喇

尋晚開始打風，睇電視話個風今朝會入九州，我哋都打定輸數今日要喺民宿渡過。果然，今朝起身嘅時候，我感覺到出面橫風橫雨，可能我哋今日嘅節目就只有睇電視 😞。

開部電視嚟睇，咦？有「甲子園」睇喎！

我呢個年紀，後生時睇安達漫畫、卡通，成日都會見到「甲子園」；今日有機會睇到開幕禮，童年回憶返晒嚟！日本嘅學界運動比賽嘅開幕禮，感覺比奧運會開幕禮好睇。

無可避免，友仔係覺得比較悶嘅😅。

不過佢都幾關注颱風八號嘅消息嘅（成日睇錯咗係「八號風球」）。

電視風暴消息話，呢個颱風喺宮崎登陸，造成唔少破壞；不過，喺別府呢度就好似香港嘅八號風球咁上下（真係八號喇）。呢個風今朝凌晨已經登陸咗，我覺得出面嘅風雨減退咗。咦，晏啲我哋可唔可以出去玩呢？

我哋本來計劃今日去一個友仔應該會好有興趣去嘅地方，就係九州自然動物公園，佢有個 Facebook 專頁；尋晚臨瞓前我喺佢哋個專頁問今日會唔會開，今朝十點幾嘅時候收到佢嘅回覆話十二點就開嘞😃。太好喇，我哋唔使成日困喺民宿！

大概十一點，我見出面啲風同雨都細咗好多，我哋就決定出去海邊嘅商場度行吓，同埋搵地方食晏。

友媽行商場就梗係想有好多地方想行㗎啦，而友仔⋯⋯睇書得嘞😅！

我哋喺商場搵埋食，跟住就預備去動園喇。

九州自然動物公園

九州自然動物公園有個日文名係「アフリカンサファリ」，即係 African Safari，非洲野生動物園。

喺別府火車站，可以買到去九州自然動物公園嘅入場券同埋去嗰度嘅巴士飛。

成人 ¥3700，小童 ¥2150，雖然係包埋來回巴士飛啫，但都唔平喎。

巴士沿住車路上山。

我搭緊巴士嘅時候，先至發現嚟別府睇溫泉，應該係要遠離市區，走上山。山上面真係見到好多有水蒸汽冒出嚟嘅地方。

坐咗差唔多一個鐘巴士，我哋見到隻大笨象。我哋到喇！

雖然啱啱打完風，但係風仲有啲大，天仲有雲，但已經冇乜雨；呢種天氣比起之前又熱又曬舒服得多。

唔知係天氣問題定係一向都係噉，動物園唔係好多遊客。

我哋一落巴士，就見到幾架「豬籠車」。

「African Safari」，就係要有呢類「豬籠車」畀我哋坐入去睇野生動物。雖然，明知喺日本做呢種動物園一啲都唔天然，動物都係被困喺一個唔多大嘅地方（只係好過一般動物園噉啦），不過對於我呢個短期內冇機會去非洲睇動物嘅人嚟講，都係有啲吸引嘅。

我哋大概兩點去到動物園，一嚟到就換兩點四嘅豬籠車乘車券。

每人有一兜野生動物嘅食物。

有一個牌教我哋，邊啲食物係用嚟餵乜嘢動物。

友仔呢個傻豬，坐上架豬籠車，未開就已經話好驚🙈！

但其實架車封到密晒，唔知驚乜。

當要餵動物或者影相嘅時候，我哋係可以打開中間嘅膠片。

開車之前，司機叔叔講解有乜要留意（當然係日文啦）。

野生動物園區真係有幾多種類嘅動物︰

最開始嘅時候，友仔都話驚，唔敢餵動物；好在後來佢都願意試餵。其實，啲猛獸都已經養到馴晒，唔係好得人驚。

我哋呢個「豬籠車」旅程都唔算短喎，超過半個鐘㗎，友仔過足癮。

呢個動物園仲有好多動物睇。

馬仔磨牙！

睇袋鼠嘅地方唔係籠，而係一個有圍欄、比較大嘅區域，遊人係可以同袋鼠有近距離接觸。呢個區域入面有一條隧道，友仔好奇走入去睇，但好快就跑番出嚟，「哎吔哎吔」噉叫，我行埋去睇，嘩！原來有隻袋鼠跳緊出嚟！其實啲袋鼠唔係好大隻，但友仔咁細粒，袋鼠可能會蝦佢，我即刻抱走友仔，好在袋鼠冇繼續衝過嚟。

差唔多四點，動物園大致上都行晒，我哋買咗啲小食，友仔又有得食雪糕。