友仔令和元年遊日本︰第十二日

第一日

第二日

第三日

第四日

第五日

第六日

第七日

第八日

第九日

第十日

第十一日

第十二日

第十三日

第十四日

第十五日

第十二日嘅相簿

離開松山，困難重重

今日係我哋喺四國嘅最後一日，火車證亦係最後一日，佢最後嘅任務，就係帶我哋離開四國。

由於民宿唔近火車站，我哋又要拎行李，我要計劃一下點樣搭車去火車站。我哋先要坐郊外電車去大手町，然後轉市內電車去火車站。去到大手町，我哋發現一個難題：我哋要抬行李行落行人隧道橫過電車軌！我本來諗住叫友媽睇住友仔，我分三次抬晒三件行李；點知⋯⋯

友仔一個人抬住自己嘅行李過咗隧道！

友爸友媽驚嘆：友仔大個仔喇！

去到火車站，我哋遇到一件烏龍事：

雖然有前人經驗話我知，喺日本坐火車要好小心留意，但今次都係衰咗。😩

我哋要坐嗰架火車喺 10:15 一號月台開出，咁我哋大概 10:05 見到有火車駛入一號月台，就諗住上呢架啦，點知：

1. 乘務員將座椅方向轉向同我諗住嘅方向相反；
2. 上到車，有廣播話呢班車乜卡至乜卡去乜地方（唔識聽）、其餘幾卡係去乜地方（唔識聽），但聽落唔似有我要去嗰個站（呢個我有刻意留意日文點讀）；
3. 10:16，車仲未開。

咁唔對路，我哋落車啦。問月台職員，職員可能因為英文係有限公司，所以唔係好答到我點解冇咗我打算坐嗰班火車。跟住我望到一個好關鍵（但係最初我唔識睇）嘅指示牌：我哋要坐嘅車係要行去月台再過啲嘅地方🙄：

而我哋上錯咗嘅車，係去另一方向，開出時間係 10:20（好在落車落得快）。

一列火車中途會分開，我試過；一個月台會有兩班行嘅方向完全相反嘅列車，真係冇留意過。

一條路軌要停兩列目的地南轅北轍嘅火車，點可以令到乘客同火車司機唔會搞錯嘅呢？事後睇清楚：除咗上面提及過嗰個牌，月台同路軌上面都有好幾個指示嘅：

塞翁失馬，焉知非福？

下一班火車，開出嘅時間係 11 點 26 分，要等多一個鐘有多。

好在我預時間鬆動咗啲，遲咁多都冇所謂；不過坐完呢班車，轉去下一程就不容有失喇。🙄

要喺度呆咁耐，友仔唔知做乜好。

塞翁失馬，焉知非福？我睇清楚啲跟住嗰班火車嘅名（宇和海 11 号），再對一下我哋喺高松火車站攞過嘅單張嚟睇吓⋯⋯

咦？呢班火車好似係麵包超人火車喎！

11 點 18 分，火車嚟喇。嘩，果然係麵包超人火車呀 😃！

車廂天花板都有麵包超人角色㗎。

不過，坐麵包超人火車，興奮都只係上車嗰一陣㗎啫，同埋火車除咗有麵包超人角色喺火車度之外，冇乜特別。

麵包超人其實唔係好特別。我就覺得我哋去到八幡濱所見到呢架「柑 bear」火車幾可愛。

告別四國，重返九州

四國同九州係兩個島，中間冇鐵路直接連接，最經濟嘅方法就係坐船。喺籌備今次旅行之前上網搵到《【日本交通】搭船往來九州四國之間。定期船班航線整理。》，佢介紹咗幾條來往九州同四國嘅渡輪航線；我哋就係喺呢度搵到「宇和島運輸」嘅船嚟搭。

火車載我哋去到八幡濱市，未去到海邊，我哋仲要搭的士先去到八幡濱港嘅碼頭。

去到碼頭，乘客買飛同等船嘅地方係有啲殘舊。

我哋即時買一點嘅船去別府。

上船喇！艘船大到可以載車㗎。

客艙唔係好多座位，主要係畀乘客有地方瞓覺。

坐，就要坐喺地。當然呢個地方要剝鞋啦。
櫃入面嗰啲係乜嘢嚟呢？

係枕頭呀。

船上面係有餐廳嘅，不過唔係好多嘢食賣。我好似買咗佢哋最後三個便當😅。

餐廳距離我哋坐嘅位置唔近，我哋買咗便當惟有拎番自己度，將喼當做枱。

又或者，一路睇風景一路食飯。

我哋嘅便當，還可以啦。

開船喇，巨輪駛離八幡濱港，向瀨戶內海（瀬戸内海）進發。

影吓 360 相先：

別府之旅，正式開始

三點八左右，船駛到別府港。

預備落船之際，我見到一直瞓喺我哋隔離嘅兩個背囊友，原來喺度「日本一周中」，佢哋靠搭順風車同搵人收留嘅方法環繞日本一周。

落船嘅時候，我哋由船上抬行李落碼頭要行樓梯。有工作人員見到友媽預備抬行李，就叫佢等陣，原來佢特登開升降機畀佢 😅：

日本人嘅服務真係冇得彈！

入到碼頭候船嘅地方，見到瀨戶內海原來有好多航線。

要喺四國、九州一帶旅行，可以諗諗「宇和島運輸」，唔錯㗎。

喺別府嘅住宿比較近火車站，但距離碼頭唔係咁近，我哋要搭巴士去。

落車嘅地方，係別府塔（別府タワー），一睇就知唔係好高。

我哋嘅住宿係喺 Airbnb 搵嘅。睇佢嘅介紹，我估屋主係韓國人。屋主好好人，除咗早兩日就開始聯絡我哋，仲有問有答，反應好快。

住宿外面，已經有 Airbnb 嘅字眼。

開門入屋，哇，地方好大呀！同上一站松山嗰度相比，簡直係兩個世界！

別府係以溫泉著名，呢度未致於室內有溫泉浸，但屋主都預備咗啲籃、毛巾、洗頭水、沐浴露畀我哋，方便攞出街去浸溫泉。

呢間住宿唔係完全零缺點嘅，不足之處就係冇友媽好需要嘅洗衣機；不過，屋主似乎提供嘅民宿唔只一個地方有，佢話我哋可以去佢另一間民宿度搵入錢嘅自助洗衣機同乾衣機。

我哋安頓好之後，第一件事就梗係去浸溫泉啦。呢間係屋主介紹嘅。

浸完，喺度買支乳酸飲品，友仔都話正！

打風！

咪睇我哋今日搭船嗰陣影啲相天色咁靚，其實我早幾日已經喺電視度睇到九州就嚟打風，仲要係我哋返嚟九州嗰日先開始打 ☹️！

我哋行去浸溫泉之前，天氣仲係好好嘅；浸完溫泉出嚟，就橫風橫雨喇。不過，入黑嘅時候，雨又唔係咁大；於是我哋趁呢個時間出番去近別府塔嘅地方搵食。我哋今晚︰食韓燒！

食完飯，反而冇乜雨；我就趁機出去洗衫，同埋行去火車站預訂埋大後日我哋諗住坐嘅火車嘅飛。我去到火車站，見到有告示話聽日嘅火車取消；不過我哋要坐嗰班車係兩日後，應該唔受影響啩？

返到民宿，睇電視新聞預測颱風路徑，睇嚟我哋最受響係聽日。我哋後日就離開別府，去下一站，唔通，我哋喺別府就只係浸一次溫泉同埋避風？ ☹️