| 第一日 | 第二日 | 第三日 | 第四日 | 第五日 |
| 第六日 | 第七日 | 第八日 | 第九日 | 第十日 |
| 第十一日 | 第十二日 | 第十三日 | 第十四日 | 第十五日 |
 |
| 第十日嘅相簿 |
又話踩單車嘅？
喺決定去四國之後直至尋日，我哋都係諗住今日去踩單車嘅⋯⋯呃，其實只係我自己同友仔，因為友媽唔識踩單車😝！正如尋日遊記所講，我哋係睇咗人哋嘅遊記，想跟人哋嘅計劃噉去；不過我睇過去可以租單車嘅地方嘅交通，係相當疏同埋早，友仔係冇辦法趕得切起身；同埋要踩嘅路線有啲上落，以及對於友仔嚟講有番咁上下長，友仔未必頂得順；最終我哋都係打消咗呢個念頭。
我哋亦都諗過去松山嘅離島，因為今晚我哋會去三津濱睇煙花，而嗰度係近碼頭，可以去啲離島；不過我哋睇過啲船嘅班次⋯⋯好少，要睇睇友媽同友仔幾點起身。
不如留番喺松山
八點幾，全家人先至醒晒，都係喺番松山度啦。去邊度好呢？尋晚我哋睇過松山嘅景點，發現到「松山城」。好啦，我哋今日就嚟呢度啦！
尋晚臨瞓前研究過我哋住宿附近嘅交通，原來我哋係幾近「郊外電車」嘅「石手川公園」站，距離總站「松山市」只係一個站，最重要係︰我哋嘅四國火車證係包埋伊予鐵嘅「市內電車」以及「郊外電車」㗎😄！
 |
| 喺住宿附近嘅石手川公園。 |
 |
| 郊外電車「石手川公園」站。 |
 |
| 大概十五分鐘一班車。 |
 |
| 呢個站係單軌雙線行車，搭車要留意電車方向。 |
 |
| 呢架就啱嘞。 |
松山城
臨急臨忙先決定去松山城，點去嘅呢？我用 Google Maps 幫手，結果我哋喺松山市轉市內電車，落車嘅地方有呢啲舊式日劇會見到嘅舖頭︰
Google Maps 話我哋應該可以喺呢條路行上松山城，結果⋯⋯
 |
| ⋯⋯封路😨！ |
呢刻我真係唔知點算好，Google Maps 喺日本唔係好可靠！但係，「Yahoo!乗換案内」嘅指示都係叫我哋行路！我最終都係要睇住 Google Maps，自行決定行走路線。
天時暑熱，友仔已經唔係好耐煩，但我哋都要繼續行，因為附近冇公共交通工具；廿幾分鐘之後，我哋見到有湖，天鵝幾靚喎。
見到天鵝，我突然醒起︰呢個唔係湖呀，係護城河呀！我睇番 Google Maps，原來我哋係圍住松山城外面嘅公園行緊，呢個公園超大！再睇清楚啲，我發現松山城東面係有吊車搭嘅，不過，仲有半個圈喎，係唔係應該搭車去呢？呢度開始有公共交通工具喎。喺我仲好忙噉搵緊點去搭吊車嘅時候，友媽見到有間便利店，就建議我哋不如入去買嘢飲兼涼吓冷氣，今日真係好熱呀！
我哋喺便利店入面飲埋嘢，又睇清楚 Google Maps，知道喺邊度搭電車，先至行番出嚟。就喺呢個時候，我哋見到︰
 |
| 預備旅行時搵到過嘅松山景點︰少爺列車！ |
 |
| 正想叫友仔預備埋位同佢影相，火車已經駛走，我只可以捕捉到佢遠去嘅樣。 |
我喺便利店入面研究咗好耐，先至搵到點樣由我身處嘅地方去到松山城吊車入口，原來我要去嘅地方喺伊予鐵路「大街道」站落車。原來只需要喺「松山市」站搭市內電車，睇啱路線，四個站就到🙄。我喺 Google Maps 搵得咁辛苦，係因為地圖上面睇到個吊車站係冇任何「松山城」嘅名，完全係我自己靠估。
由「大街道」行入去嘅幾百米嘅路，係幾舒服㗎，點解？睇吓下面呢兩條片，記得開聲喎︰
冇幾耐，我哋就行到嚟 Google Maps 冇話係乜嘅松山城吊車站入口︰
 |
| 我喺 Google Maps 完全見唔到呢個地方囉。 |
 |
| 小朋友畀呢個公仔嚇親，大喊。 |
 |
| 我哋買咗吊車嘅來回飛。 |
 |
| 哇，乜好似滑雪坐嗰啲噉嘅？ 哦，有兩款。我哋一家三口所坐嘅係有車廂嗰種，呢張相係喺吊車車廂影出去嘅。 |
世界任何地方嘅城樓、城堡係幾值得參觀嘅，松山城都唔例外。不過，我哋剛才可能買錯飛，原來我哋買咗嘅飛只能夠搭吊車，唔包城樓入場費；我哋要再買過飛。
城樓有啲歷史文物展出。
城樓仲會有啲會定期轉換嘅展品︰
小朋友仲可以試着武士服裝添，不過友仔冇興趣︰
城樓上有啲機關都幾特別︰
城樓頂望出去松山嘅風景︰
行完城樓，返到出嚟露天地方，熱辣辣，買番啲刨冰、軟雪糕食先！
 |
| 喺愛媛縣，梗會有一啲食品係話用愛媛柑做嘅。我呢杯軟雪糕同友媽嘅刨冰，就係愛媛柑味㗎嘞。 |
歎完冰，落山喇。難得有「滑雪吊車」坐，我想去試吓。友仔咁細個，梗係由友媽帶住坐番有車廂嗰種啦。
 |
| 友媽、友仔就係喺右邊嗰架吊車入面。 |
 |
| 咦？畀友媽影到我！ |
 |
| 連坐吊車都可以聽到風鈴嘅聲音。 |
落番山，見到呢張海報︰
 |
| 現存 12 天守，我哋去過兩個喇。另一個就係我哋四年前去過嘅姬路城。 乜嘢係「天守」？我唔知喎，哈哈😅⋯⋯ |
行過佈滿風鈴嘅街，我哋返到「大街道」。
已經兩點喇，大家都好肚餓，要去食飯。我哋行入「大街道」商店街，搵到呢間牛肉飯專門店，友媽話係香港人呢輪講話好食過吉野家嗰間︰
真係喎，又平又好食！
題外話︰我哋喺行過去松山城嘅途中見過兩間學府，感覺有啲特別︰
 |
| 愛媛縣嘅教育始創之地？ |
 |
| 原來唔係只有香港嘅學校先會喺校門展示學生嘅升學威水史。 |
 |
| 呢句英文⋯⋯ |
道後溫泉
去完松山城，跟住就去一個本來都計劃咗要去嘅地方︰道後温泉（道後溫泉）。因為早已經有計劃，所以嚟呢度係比較順利嘅。
 |
| 我哋坐市內電車，喺「道後溫泉」站落車就到喇。 |
落車冇耐，好好彩畀我哋遇番少爺列車！
 |
| 影完呢張相冇耐，少爺列車又開走喇！ |
我哋嘅目標係喺「道後温泉本館」浸吓溫泉，行入去嘅途中經過商店街。
好多嘢賣噉喎。友媽話浸完溫泉一定要買啲嘢走。
到本館喇，幾靚喎！
當我哋正想入入去買飛嘅時候，估唔到鍾意浸溫泉嘅友仔扭計，猛話唔想入去🙄！難得嚟到，冇理由唔入去㗎哇？佢扭咗好耐，最後友媽問佢係唔係以為「浸完溫泉就要去瞓覺」，佢話係，因為我哋屋企嘅習慣係瞓覺前先去沖涼；友仔覺得仲有好多嘢想做，唔想去訓覺，所以就唔肯去「沖涼」。經過友媽詳細解釋，友仔終於釋除疑慮，肯跟我哋入去；結果，浸溫泉嘅時候，佢都唔知玩得幾開心！
本館本來係有兩層嘅，但呢段日子樓上裝修，我哋只可以喺樓下活動。即使係噉，我都覺得好正喇，尤其係浸溫泉嘅地方裝飾得好有特色。如果想睇，可以去 Google Maps 度搵。（按︰寫遊記呢刻先發現︰Google Maps 竟然可以有得用虛擬實景形式參觀本館！）
由於我哋唔係住喺附近，我哋唔會帶備番梘、洗頭水、毛巾之類，所以我哋要租毛巾，買番梘同洗頭水。番梘同洗頭水係值得買嘅，因為都係愛媛柑嘅氣味。
浸完，友媽喺附近買咗啲貴價柑汁（定係橙汁呢？）︰
但因為浸完溫泉，個身熱辣辣，我想食凍嘢，所以呢幾包果汁我哋諗住帶番去住宿度雪凍先飲，而我哋即席去便利店買凍嘢。
 |
| 友仔揀咗波子汽水味雪條。 |
 |
| 友媽要咗罐愛媛柑味啤酒。 |
 |
| 我呢杯係愛媛柑刨冰。 |
食完凍嘢，我哋喺商店街周圍行，買咗啲同愛媛柑有關嘅食品；其中，我揀咗兩樽柑皮果醬，唔知好唔好味嘅呢😋？
買完嘢，我哋就趕返去住宿喇，因為我哋今晚仲要去睇煙花。我哋喺住宿附近嘅便利店買咗幾個飯團同嘢飲，當係今晚嘅晚餐。
無心插柳之三
細個時候睇日劇或者日本卡通片，都會有提及過「花火大會」；我哋尋日嚟到松山見到今日因「三津滨花火大会」（三津濱花火大會）嘅交通安排，梗係要把握機會去睇吓啦。
 |
| 石手川公園電車站貼咗今晚加班車嘅時間表。 |
 |
| 電車入面好多人都着咗浴衣（友媽話呢啲唔係和服喎）。 |
我哋好好彩，唔駛轉車，直接由石手川公園搭去三津落車就得嘞。
 |
| 三津站，好逼人。 |
三津站有警察維持交通秩序。佢哋啲警察都好有禮貌。
喺邊度放煙花呢？我唔知呀，總知跟住大隊行就得啦😆。
穿過大街小巷（有啲仲要係冇路燈）行咗廿幾分鐘，我哋行到一個大型停車場度坐低。呢度應該係漁市場所在地。
 |
| 吖，我哋冇地蓆！ |
 |
| 天氣熱呀，好在我買咗樽冰硬咗嘅飲品，可以畀我降吓溫。 |
夜晚八點，花火大會正式開始！煙花幾乎係喺頭頂位置爆開，「轟隆」「噼啪」聲不絕，好震撼！
畀大家睇睇四周圍幾多人︰
影得麻麻地，不過都想獻吓醜︰
臨尾係煙花放題！
近一個鐘頭嘅花火大會，友媽同友仔都覺得幾好睇同埋幾震撼；我都覺得唔錯嘅，不過可能我因為試過喺香港去到尖沙咀近距離睇煙花，所以我感覺香港嗰啲靚啲。
其實我唔係咁鍾意去多人嘅地方㗎，就係因為走嘅時候係需要同人逼😵。
 |
| 九點半，我哋行到三津站，但其實喺小巷度已經開始有人排隊等電車。 |
 |
| 上到電車月台都要等一輪先上到車。我上到車嗰陣，已經差唔到夜晚十點鐘。 |
我哋搭呢班電車冇得直接去石手川公園，要喺松山市轉車。返到住宿，已經十點八咯。
好，聽朝就瞓晏啲先起身啦😴。
No comments:
Post a Comment