NL MK: 友仔令和元年遊日本︰第六日

第一日	第二日	第三日	第四日	第五日
第六日	第七日	第八日	第九日	第十日
第十一日	第十二日	第十三日	第十四日	第十五日

第六日嘅相簿

最後一日開工

最初，我哋諗住去咗八幡製鐵所就任務完成，不過尋晚 Yassan 畀咗一張介紹「北九州市大里地区」（亦即係「灯火」所在嘅區域）嘅單張我哋睇，話小森江火車站附近都有啲工業文化遺產；我哋醒起旅行之前為咗我哋嘅任務搵資料，好似見過 Yassan 所講嘅建築物，而且呢個地方又近小森江，我哋決定今朝早先去咗呢啲地方，然後先至去我哋諗住想去嘅小倉。就係噉，我哋今朝「加班」😆！

關門「懷舊」海峽——時光的車站、近代化的記憶

我哋由「灯火」行番去小森江火車站，路軌另一邊有一啲紅磚建築物，就係好有歷史價值嘅工業文化遺產。

睇吓我哋點樣喺火車站行過去。

就係呢度喇，保養得唔錯㗎，連周圍啲花草樹木都靚啲。

連介紹嘅牌都有，真係冇諗過呢啲咁僻嘅地方都會整得咁靚。

我哋唔係好識睇日文，不過憑漢字去估，呢度以前係貨倉嚟嘅。家下都整得好靚噉喎，係唔係仲用緊嘅呢？仲有，呢度似乎都係冇得入去參觀嘅。

影張 360 照片，畀大家睇下四周環境。

根據單張所述，工業遺產唔只呢個貨倉，行過啲仲有其他；不過因為天氣太熱、太陽太猛，我叫友媽、友仔返去火車站休息一下，我就繼續沿鐵路邊嘅那路去搵。

我哋見到呢度係製糖廠：

我留意到馬路兩邊都有幾座用磚頭起嘅建築物，都有人喺入面做緊嘢，似乎唔可以入去參觀。喺我行緊嗰陣，仲聞到一陣陣糖味。

行到糖廠盡頭，過對面馬路影番嗰邊嘅建築物先︰

睇嚟近小森江嘅製糖廠係唔可以入去參觀嘅，我哋就離開呢度，去單張介紹嘅（而我哋隱約記得事前預備嘅時候有見過嘅）唔知乜鬼「赤煉瓦」乜乜乜🙈。

小森江站牌上面嗰朵係乜嘢花呢？

我哋要去嘅地方係門司，火車坐一個站就到。

門司站大些少，起碼佢係一個轉線站，可以喺呢個站轉去下關。

我哋落車，行上橋，就見到呢個公仔，好得意︰

另一邊就見到呢個牌，哦，係叫做「門司赤煉瓦プレイス」，係物質文化遺產。

又係指示極多，唔駛驚盪失路。

呢度有好幾座紅磚建築物︰

另外仲有一座用磚砌成嘅建築物，不過唔係紅色嘅︰

呢一間係可以入去參觀嘅，原來係一間講釀酒歷史嘅博物館︰

入場費好平，大人 ¥100，小朋友 ¥50。

文化遺產證書？

入到去，都幾多嘢睇㗎，不過酒唔係我好感興趣嘅嘢，我淨係覺得啲舊嘢好正，至於邊啲嘢係乜，就冇仔細睇。

唔同級數嘅酒可以喺呢啲水龍頭斟出嚟。

友媽好欣賞呢個介紹釀酒廠各個部份嘅展示方式︰平面圖上加番個相同比例嘅模型，參觀者會覺得好清楚。

咦？友媽發現咗啲嘢︰

呢座建築物所用嘅磚係用礦渣製成㗎！

繼續睇舊嘢︰

樂譜都有？係廣告歌？定係啲員工喺慶典時所唱嘅歌？

廣告手稿都有！

友媽話呢張睇到唔同時代有邊啲牌子嘅酒面世︰

友媽又有發現喇︰

呢度更加清楚噉講，呢座建築物嘅磚係由八幡製鐵所鍊鋼時所產生嘅礦渣製成嘅︰

睇吓啲磚嘅顏色，同隔離嗰座嘅紅磚係唔同㗎︰

唔只，二樓橫樑嘅鋼係嚟自八幡製鐵所㗎。

唔怪得我哋喺香港預備行程時搵八幡製鐵所嘅資料係會搵到門司呢度嘅釀酒廠啦。

出番嚟，見呢度咁靚，又影張 360 照片先︰

喺「門司麦酒煉瓦館」對面馬路嘅紅磚建築物，係「門司赤煉瓦交流館」。不過入面有活動進行緊，冇得入去參觀。

喺「門司麦酒煉瓦館」隔離嘅紅磚建築物，似乎係餐廳、cafe 或者係酒吧：

我哋睇個天似乎想落雨，而我哋喺火車站行嚟嘅途中唔見有其他食肆，時間亦已經過咗中午十二點，呢間餐廳價錢睇落都 OK，我哋決定入嚟呢度食午餐。

呢間餐廳裝修簡約，顧客低時平望嘅範圍整得幾舒服，不過高啲嘅地方就夠晒古舊：

望住天花板，可以睇得出以前呢度係酒廠。

行入些少，係可以畀客人坐埋一齊傾偈或者開 party 嘅地方，都係保留咗以前啲嘢喺天花板。係唔係酒缸嚟呢？

我哋本來冇諗住喺度食飯，係因為我哋一直有個觀念，舊嘅建築物被活化之後，通常會變成賣貴嘢嘅地方。呢個情況喺香港好常見，不過我哋睇過個餐牌，又唔係好貴咋喎。

啲飯又真係幾正噉︰

喺我哋食緊飯嘅時候，天真係落起大雨嚟。我哋慢慢食，食完等到佢停雨先至走。

今朝我哋去過嘅地方，事前冇諗過要嚟。好在有嚟唧，收穫豐富。我哋喺食飯期間將一啲相發送畀鞍山探索館，佢哋話餐廳嘅活化方式好值得佢哋參考。

去小倉睇廁所🚽

我哋由門司坐火車，一個站就到小倉。一般遊客嚟小倉，應該係會去小倉城，不過我哋唔去，而係去睇廁所，因為嗰度有個「ＴＯＴＯミュージム」（TOTO 博物館），友仔應該會鍾意😅。不過噉，TOTO 做廁所出晒名，應該會有幾多嘢睇嘅，其實友爸友媽都想去睇嘅。

TOTO 博物館唔近小倉火車站，友仔首先要睇吓地圖，研究下點樣去︰

無論係點去都好，當然都係坐單軌電車啦，友仔想坐吖嘛，雖然 TOTO 博物館唔近電車站。

落車嗰個站叫做「香春口三荻野」，讀落好似怪怪哋噉。

落到街上望番單軌電車︰

行咗十幾分鐘，我哋先至到 TOTO 博物館。

友仔行到門口，就唔理我哋兩個，自己行咗入去︰

我哋一行入去，就受到熱情招待，真係有貴賓嘅感覺！我哋最估唔到嘅係︰呢個博物館唔收入場費㗎！

呢度一樓係 showroom，二樓先係博物館。

博物館唔收入場費，唔代表設施簡陋；相反，博物館為每個參觀者提供一支語音介紹筆（要還嘅），喺張博物館地圖上面篤一篤展品嘅編號，就可以聽到展品嘅介紹，仲有日文、英文、普通話同韓文揀添。

友仔好留心噉聽㗎。

一入到門口就見到唔同款式嘅坐廁︰

博物館最開始係介紹公司嘅歷史，原來 TOTO 最開始係做瓷器㗎，係因為個老細去外國見到人哋嘅坐廁好方便（當時日本應該都仲係用緊踎廁），於是就開始研發坐廁。

睇下 TOTO 以前係做乜嘢︰

佢哋用過嘅公司商標，道出公司曾經出現過困難。

跟住我哋見到一個好搞笑嘅展品︰

呢部電單車真係行得㗎，同埋佢係用糞便嚟驅動嘅。呢部電單車曾經由東京開去北九州，沿途向居民宣揚環保概念。至於個馬桶係唔係真係用得呢⋯⋯佢冇講喎。

TOTO 後來為人所認識嘅就係整廁所；除咗馬桶，當然仲有整其他廁所配件啦︰

TOTO 原來做有研究點樣可以令佢哋嘅包裝物料用少啲紙︰

入到另一個展館，有廁所嘅歷史：

日本初時有新款式廁所時，好多人都唔識用㗎。

呢個係喺國會入面第一個坐廁，展板話廁所個邊咁花，係因為當時好多人唔知點用坐廁，佢哋係會雙2腳踩住廁所嘅邊，踎喺度去廁所。

以前要喺呢度攞水用㗎。

睇吓個尿兜同埋踎廁整得幾靚。

普通嘅踎廁，係旱廁嚟。

呢啲係近代啲㗎喇︰

喺啲公廁度見到啲所謂「和式」廁所

喺啲公廁度見到啲所謂「洋式」廁所

我細個見過嘅時候一啲屋企入面嘅廁所就係噉嘅樣。

呢個唔算新，但肯定係靚嘢，有得洗屁股，仲係用暖水添。

呢個展廳仲介紹咗 TOTO 公司入面嘅重要人物，同埋舊時佢哋嘅數簿、用過嘅量度工具。

仲有啲唔同款式嘅廁所、浴缸模型，可能係畀員工拎住出去同客傾生意用。

入到去第三展廳（嘩，咁大嘅，仲未行完），仲有唔同款式嘅廁所、安裝喺特別地方嘅廁所等等︰

第一個家居豪華廁所︰

友媽好欣賞呢啲成 set 嘅洗手盆連梳粧枱︰

第一個用喺酒店入面、成套嘢裝入去嘅浴室。

唔同年代生產出嚟嘅抽水馬桶，趨勢係越嚟越慳水。
以我所知，日本係用食水沖廁嘅。

佢呢度介紹尿兜，有一樣嘢我係幾認同︰佢哋近來生產嘅尿兜係大人同小朋友都可以用到。唔知點解香港絕大部份男廁整尿兜係要幾個大人先用到嘅尿兜加一個小朋友尿兜，我試過一次同友仔去廁所，要排隊去，大人好快就可以輪得到，但最需要去廁所嘅友仔就只可以排嗰個小朋友尿兜。

「音姬」係一樣我點都唔明白佢有乜用嘅廁所設備。

相撲手、幼兒都可以有專為佢哋而設計嘅坐廁︰

唔同時期、種類嘅水龍頭、花灑都有介紹︰

整到電話噉嘅花灑？

可以溝冷熱水嘅水龍頭，入面嘅構造都可以畀埋我哋睇。

對於我同友仔嚟講，呢個博物館最精彩嘅地方係可以睇到唔同廁所嘅沖水原理、沖廁嘅水箱點運作、水龍頭點樣溝冷熱水⋯⋯，實在太多喇，簡直係目不暇給！博物館五點閂門，我哋真係睇到四點九㗎。友媽就比較快睇完，不過佢都話好多嘢睇，冇諗過我哋可以喺呢度消磨整個下晝。

到此一遊。

友爸友媽買咗啲記念品之後，距離博物館閂門時間仲有五分鐘，博物館已經播出《Auld Lang Syne》音樂，但友媽好想入去一樓個 showroom 度睇睇，因為佢話作為一個家庭主婦，廁所、廚房係好好睇嘅；佢同一個職員講咗佢嘅意願，嗰位職員竟然話可以入去睇，不過要快啲！友媽於是飛咁快噉入咗去 showroom，五點前好開心噉行番出嚟🤣。

睇完廁所，又差唔多晚飯時間。我哋行番去單軌電車「香春口三荻野」站。