友仔令和元年遊日本︰第五日

第一日

第二日

第三日

第四日

第五日

第六日

第七日

第八日

第九日

第十日

第十一日

第十二日

第十三日

第十四日

第十五日

第五日嘅相簿

暫時離開九州

小森江、門司港係喺海邊，Yassan 話個海就係「関門海峡」（關門海峽），對面岸係「下関」（下關），屬於本州範圍。今日，我哋會短暫離開九州，去本州嘅下關行吓。

對於我哋住喺小森江嘅遊客嚟講，要去下關，最方便就係去門司港坐船。

遊客去下關，最主要係去唐戸市場（唐戶市場），係一個魚市場，嗰度出名多雞泡魚。魚市場最熱鬧嘅時候係大清早，不過由於友仔同友媽唔願早起身，我哋成差唔多十一點先至去到門司港等搭船。我哋去到會睇到乜嘢呢？

去到下關落船，就見到一啲雞泡魚裝飾︰

唐戶市場距離碼頭唔係好遠︰

入到唐戶市場，已經差唔多十一點半，入面好多魚檔都已經冇人同埋冇晒貨 😅。

冇乜嘢好影，同隻大雞泡魚影張相啦︰

咁難得嚟到雞泡魚出名嘅地方，友媽話點都要買啲雞泡魚手信，但友仔就一定唔會願意行街市，所以友爸我就帶咗友仔去佢一定會鍾意嘅地方︰海響館，係一個水族館嚟嘅。

大人 ¥2000，一位，友仔要 ¥900，都唔平，好在友媽冇諗住入嚟。

果然，友仔喺度睇得好興奮︰

有好多層行喎。

最先係企鵝。

下面有乜睇？

咦？有啲企鵝可以頂得順咁熱嘅天氣？

呢度都會好似海洋公園噉有海豚表演，不過友仔唔感興趣。

開始落雨喇，我哋快快趣趣入室內。

喺啲魚下面睇住佢哋向住同一個方向游，感覺好治癒。

水族館入面有龍友㗎！

啲魚又真係幾靚嘅⋯⋯

呢度係下關，當然會有雞泡魚啦。估唔到雞泡魚有咁多款喎。

友仔話呢條大魚叫做「翻車魚」喎。

呢啲咁奇形怪狀嘅魚都係雞泡魚（好似係）。

水面近右邊有隻賬咗嘅雞泡魚。

呢個雞泡魚標本將每條刺編咗號碼，方便數刺嘅數目。

海響館仲會將海岸淺水生態展現喺一般人視線水平，唔駛踎低睇。

呢隻蟹嘅鉗好大！

呢隻係馬蹄蟹，學名係「鱟」（唔識讀😛）。

估唔到可以喺噉樣嘅角度影招潮蟹同埋彈塗魚。
點解友仔係噉講「三葉蟲」嘅🤔？

到一個大魚缸，見到一條好大嘅魚，長過一個小朋友。

行落一層，見到一副鯨魚骨，友仔同我講話有鯨魚嘅後腳（近尾比較細同距離脊骨稍為遠嗰對）🙄。

去到賣紀念品嘅地方，友仔又係話呢副唔知乜嘢骨又係有一對退化咗嘅後腳。

我哋喺海響館仲見到有介紹話一條魚曾經送過上太空，不過我冇影到相。

我哋去咗海響館，友媽買完雞泡魚手信之後做乜嘢呢？就係被困於便利店，因為出面落大雨😆，惟有喺入面飲啖茶，食個包︰

我同友仔喺海響館只係睇咗一個鐘左右，算係短喇。友仔家下入博物館唔會乜都睇好耐嘅。

出嚟搵番友媽，一齊去搵飯食。我哋喺碼頭附近搵到一個地方有得食雞泡魚天婦羅飯︰

好大碗呀，好飽！¥1000，抵食！

食完飯，我哋就離開咯，落雨濕濕，魚市場閂咗，下關諗唔到有乜好行（要啱友仔㗎喎）。

對英文字敏感嘅我，又見到有啲英文唔妥嘅嘢喇。

坐船返門司港嗰程，友仔要坐上船艙頂，吹海風。

拜拜下關，我哋返九州喇。

貨櫃船即將駛過関門橋（關門橋）。

重臨舊地

四年前我哋嚟門司港，已經嚟過九州鉄道記念館（九州鐵道記念館）。今時今日，友仔依舊鍾意火車，所以我哋舊地重遊。

上次友仔匿喺ＢＢ車唔肯出嚟，今次佢就肯同啲舊火車影相喇︰

入到室內展館，猛話自己唔係ＢＢ嘅友仔，始終都係要玩ＢＢ火車🙄︰

鐵路宅會鍾意睇埋啲火車飛、舊有火車相關設施等等，友仔唔算好有興趣。

呢架我車我哋有坐過！

點解要影呢張相？

因為四年前有呢張相囉🤣︰

又要喺窿窿板度影相？

上次我哋嚟嘅時候，冇留意到有個噉嘅地方喎。做乜嘅呢？

哦，係迷你火車。

吓？友仔你都要坐🙄？¥300 一程喎（好在唔係一人一票），即係九州鐵道記念館嘅大人入場價錢喎！

五分鐘唔駛就坐完，真係貴💸。

我寧願你喺呢啲舊火車頭度玩耐啲囉🙈。

友媽好記得上次嚟門司港嘅時候見到街上有鐵路，佢話今次嚟一定要坐吓。呢個就係「潮風号」（潮風號），係一架懷舊火車，由「九州鉄道記念館駅」來往「関門海峡めかり駅」。

最後嗰班大概四點半就開，所以我哋喺九州鐵道記念館睇到四點鬆啲就走。

架車幾可愛喎。
我留意到除咗有小朋友嘅家庭之外，其實都有啲大人特登嚟坐。

火車開喇！
背景啲「嗚嗚」聲係一位好興奮嘅小朋友發出嘅，唔係友仔。
留意近尾有一位女聲報站同講解，係唔係好 standard 嘅聲音呢？我最初以為係靚女嚟㗎，點知原來係一位大媽😂。

火車臨近「関門海峡めかり駅」嘅時候，係會經過一條隧道。車廂天花原來係咁靚㗎！

到總站喇，落車影影周圍環境︰

又有舊火車擺喺度？

呢度可以見到關門橋，有個公園，行遠啲就係可以通去下關嘅行人隧道出入口。

我哋係買咗來回飛嘅（大人 ¥600 來回，小朋友 ¥300 來回）。火車嚟到總站只係停十分鐘就要走，而我哋要坐嗰架係尾班車，我冇得去行人隧道出入口度睇添😕。

返番去門司港火車站。

又影吓呢個「０哩」碑。

喺小倉食個飯

前晩已經喺門司港食過晚飯，呢度食飯亦係比較貴；我哋搬去小森江嗰日，Yassan 話建議我哋喺小倉食晚飯，於是我哋今晚就去小倉食啦。

小倉係我哋聽日打算會去嘅地方，呢度其中一樣友仔會有興趣嘅嘢，就係單軌電車︰

呢個卡通⋯⋯好熟口面喎！銀河鐵道九九九？千年女王？

我哋出咗小倉火車站，落咗地面，行入商店街，不過都係搵唔啱，結果我哋喺火車站附近嘅商場搵到間餐廳食飯。

我哋食完晚飯之後，大概七點幾，友媽好想去行吓商場，我同友仔就返去小森江先。點知，我哋喺小森江落咗火車冇耐，就收到友媽訊息，話佢都返緊嚟咯，因為⋯⋯商場大概八點播緊《Auld Lang Syne》音樂，即係就快閂門喇🤣！

Yassan 尋晚向我推介去睇北九州夜景，不過，交通唔係好方便，同埋友仔唔可以太夜瞓，都係唔去咯。