友仔令和元年遊日本︰第八日

第一日

第二日

第三日

第四日

第五日

第六日

第七日

第八日

第九日

第十日

第十一日

第十二日

第十三日

第十四日

第十五日

第八日嘅相簿

決定去四國喇，但睇乜嘢好？

決定去四國之前，我哋除咗麵包超人火車之外，對四國一無所知（冇理由只係遊麵包超人火車河㗎😅）；後來友媽喺網上搵咗一啲資料，先至發掘到一啲景點。其中，友媽搵到一啲同睇峽谷有關嘅巴士團，我見到人哋影嘅風景相咁靚，就決定要嚟呢度：大歩危（大步危）、祖谷。

曾經諗過：好唔好喺嗰度過一晚夜呢？不過睇埋我一啲已經定好嘅行程，時間唔夠，最終都係報呢個觀光巴士團：

網上搵到嘅資料話，呢個巴士團最好預先報名，即興未必有位。預訂網址：http://yonkoh.co.jp/teikan
大人 ¥8500，小童 ¥8000，都幾貴㗎。

我哋由尋日開始至聽日呢三日兩夜，都係住喺高松，位於香川県（香川縣），但主要行程都唔係喺香川縣；今日我哋去嘅大步危、祖谷就係喺徳島県（德島縣）。

離開香川縣，走入德島縣

報咗巴士團，十點四要到集合點：阿波池田火車站，但係火車班次疏，我哋驚中間有火車誤點累事，所以我選擇早啲去到，噉樣我哋就要七點半就要出門口喇。呢個時間，聽落唔係好大問題，不過對於鍾意賴床嘅友媽嚟講😏⋯⋯好在，我哋都能夠準時出門口。

尋晚冇買定早餐，今朝我哋喺火車站嗰度搵早餐食。
呢餐好似係我哋今次嚟日本嘅第一次快餐。

我哋坐呢班火車嘅話，九點幾就會到阿波池田，真係會好早，不過呢班火車勝在唔駛轉車。
如果下一班嘅話，時間會比較 fit，但中間仲要轉一次車。

四國係鄉下地方，火車軌旁邊大部份都係農田。

坐咗一個鐘頭左右，九點五，我哋就到咗阿波池田喇。我哋已經離開咗香川縣，入咗德島縣。

嚟到阿波池田火車站，都有唔少麵包超人嘅嘢。

時間咁多，周圍影下相先。

阿波池田站外觀。

我哋要搭嗰架觀光巴士就係喺度上車。

車費表

呢架係好靚嘅觀光火車，車費當然唔平啦。

我哋太早嚟到，但火車站附近好靜，冇乜地方好行，我哋只可以喺火車站入面呆等。友仔就唔係咁有耐性，猛嗌悶；好在火車站有間「七．十一」，入面都有啲得意嘢睇下。其中，友仔睇中咗一架我哋尋日坐過嘅「Marine Liner」火車嘅紙板模型，佢好想要。嗯⋯⋯一直都係大人買嘢，我哋冇乜行過有啱友仔嘢嘅舖頭，就買呢個畀佢啦，不過我唔係即席買畀佢，係喺佢冇留意嘅時候買，費事佢覺得見到想要就可以買。

😪⋯⋯終於等到十點四，我哋要坐嘅觀光巴士到喇。

咦？唔係懷舊版巴士咩？睇清楚宣傳單張介紹，原來八月雖然每日有團，但可能會用普通旅遊巴士。
冇所謂啦，有得去就得。

大步危、祖谷觀光巴士團，正式開始！

觀光巴士團除咗有司機，仲有一位女士充當導遊。導遊似乎只可以講簡單英文，不過佢都好盡力噉招待團友嘅。

我哋呢團似乎全部都係華人，友媽話，佢睇到點名表，只係有香港人同台灣人，夾埋唔夠廿人。

團友上晒車，旅遊巴開咗冇耐，我見到導遊姨姨搞緊一個小型機器，跟住擺個咪埋去，我哋就聽到啲好生硬嘅普通話😅，原來佢係用緊翻譯機！我最初聽唔明個機器想講乜，後來旅遊巴去到一個似乎係巴士總站嘅地方停低咗，導遊話「change」，哦⋯⋯原來剛才我聽到嘅普通話係叫我哋轉巴士😅！

我哋唔係淨係要轉車嘅，其實係要去番旅行社度核對番報名資料。

導遊姨姨派咗單張畀我哋，友仔又好專注噉睇喇。 🤦🏻‍♂️

再上番車，開始行程。巴士行咗冇耐就入咗山區。

沿路我哋都見到呢條河。

睇到山上面嘅髮夾彎車路嗎？

河谷一景。

十一點二左右，我哋嚟到第一個景點：平家屋敷。

呢間屋嘅屋主祖先係日本皇帝嘅御醫，後來走難嚟到祖谷山區定居，同呢度嘅人醫病。

可惜陽光唔係咁啱，呢張相嘅曝光好差，但係都值得影低，因為呢個牌介紹平家屋敷嘅由來。

以前嘅日元︰

當家嘅用具︰

舊課本呀！

我認識嘅日本樂器，其實同中樂嘅三弦、簫有啲相似︰

投票箱︰

仲有唔少古老嘢睇︰

行到出屋外面，友仔都可以搵到好多嘢睇︰

今日呢度都幾熱，但竟然會有紅葉（得一棵樹啫）︰

仲有隻懶瞓嘅柴犬！

呢間屋望出去山谷嘅景係噉嘅。喺呢度住應該幾舒服。

十一點九，嚟到下一站︰食晏。

呢度似乎係一間好靚嘅餐廳喎！

我哋未坐低，枱面已經擺放咗部份美食。以下呢張相應該係啲嘢食嚟齊晒︰

友仔食得幾滋味！係佢最鍾意嘅烏冬呀！

呢個餐相當豐富，友仔當然食唔晒啦。

友仔食飽咗，我就要帶佢出外面行吓。呢個時候，又畀佢見到啲有趣嘅嘢︰

呢間餐廳當然係靚啦，「祖谷美人」係靚酒店嚟㗎，睇佢廁所出面嘅大堂就知啦︰

見到呢個巴士站，我先至留意到呢個地方原來唔跟觀光巴士團、唔揸車都可以嚟到㗎。

十二點八左右，我哋到下一個景點。導遊姨姨話係一條吊橋。（咦？我哋最近幾次旅行都要行吊橋喎 😆！）

落咗車，先行過一啲賣嘢同有展品嘅地方︰

要行好一段路先至可以去到吊橋︰

離遠望，好似一條用繩織成嘅橋 😮︰

過橋係要課金嘅，不過我哋嘅團費係包埋嘅︰

行近「祖谷のかずら橋」（祖谷的蔓橋），睇清楚啲，哦，原來吊橋係由藤蔓織出嚟︰

影張合照先！友仔塊面噉嘅樣嘅？

行喇！

哇，友仔點解嗌晒救命嘅？

撳下面呢齣片睇吓就知喇︰

其實我自己都驚叉錯腳！

條罅幾闊😨！

呢張合照影得有啲艱難︰

友仔，就嚟行完喇，加油呀！你好叻仔呀！

行完，喺另一個角度睇條吊橋︰

行完吊橋，就去睇瀑布︰

由瀑布行番上去旅遊巴士途中，我哋見到一啲喺剛才好正嘅午餐當中有食過嘅嘢，似乎係呢度嘅地道小食。

一點半，我哋去到「祖谷渓」（祖谷溪），賣點係「ひの字渓谷」︰

我淨係識得講話「靚景」，友媽就可以同友仔解釋呢個係乜嘢地理特徵⋯⋯ 🙄

睇完呢個地方，上番車行多唔夠十分鐘，就嚟到「小便小僧」︰

今次畀張 360 相大家睇睇︰

睇完小便小僧，我哋就向大步危進發。兩點左右，我哋到咗「道の駅大歩危」，入面有個「妖怪屋敷」，好多妖怪，不過都唔恐怖嘅？

除咗妖怪，呢度仲有啲介紹礦石嘅展品。

不過，好多展品唔係好關大步危事。

咦，有個「石片琴」？

聽吓友仔示範︰

聽落好似係「磬」嘅聲音。

咦，門口有個石造嘅麵包超人︰

我哋最後一站，就係坐船仔，遊覽「大歩危峡」（大步危峽）。

兩點八左右落車，用幾分鐘行落碼頭。

落到谷底，GPS 唔係好收得到衛星訊號 😦︰

呢度坐船仔，人人都要着救生衣。小童救生衣都有。

我哋坐船仔主要目的係睇景，唔係玩激流，所以船仔行得唔快，亦好穩定。

啲石都幾得意嘅，不過我聽唔明船家嘅日文介紹，唔知有乜特別。

咦？呢個位有漩渦喎。

我嘗試用我部 360 相機拍片，喺回航嗰程拍咗差唔多十二分鐘。呢個時候，船家播普通話景點介紹，不過我唔係聽得好清楚。

呢個船河，來回程近半個鐘頭，友仔又悶又熱又攰，回程時瞓着咗。

返到碼頭，又影張 360 相先！

我哋行番差唔多最高嘅地方，見到梯級有一條線︰哇，原來水位曾經去到咁高！

咁熱，梗係要買雪糕食吓啦！

呢度啲人真係識𠱁遊客開心。佢哋知道我哋係香港遊客，就喺我哋上車預備走時揸住呢啲牌送客︰

跟住，我哋都見到佢哋拎住台灣旗同「我愛台灣」嘅牌。

雖然明知佢哋係為咗做生意而噉樣做，但喺今時今日香港噉嘅時勢，見到呢啲牌，可以為我帶來一點安慰。

離開德島縣，返高松咯

遊完船河，坐車返到阿波池田火車站，旅程正式結束。

我哋喺阿波池田等火車時，喺月台附近見到個溫度計，哇！晏晝四點幾，都有攝氏三十八度呀 🥵！

不過好感恩，今日天氣好好，我哋可以睇到好靚嘅風景；連坐火車返去高松嘅時候，見到窗外嘅風景都係好靚。

返到高松，又有意外驚喜︰見到兩架麵包超人火車呀！

突然醒起︰之前我諗住去食國遊麵包超人火車河㗎喎，但現在我哋只係睇，冇得坐。其實我哋喺四國呢五日，有冇機會坐到麵包超人火車呢？嗯，要攞張單張時間表睇睇先！

五點八返到高松，我哋返酒店休息一下先，不過我哋都唔可以抖太耐，根據尋晚嘅經驗，天黑就會難搵嘢食，所以我哋趁個天仲光嘅時候走出去搵地方食晚飯。

我哋行咗去「兵庫町」呢條商店街，順便行吓啦。

唔通我哋都係太晏出嚟？點解得咁少舖頭開門？

咦？有 Aeon 單車舖？

噢，行到商點街另一邊，人氣多番啲。

我哋喺呢度搵到間手打烏冬店，就喺度食晚飯啦。

正呀！

食完飯，七點幾，太陽落山，不過今晚行番酒店時仲見到少少晚霞。

喺香川縣住，但冇機會喺香川縣遊覽 🙄

睇其他人寫嘅遊記，佢哋去高松，通常會去埋香川縣嘅景點，例如小豆島，四國火車證係包埋前往嗰度嘅渡輪同島上嘅巴士；不過，我哋聽日要離開高松去松山喇，我哋主要嘅旅遊地方都唔喺香川縣，主要係因為一啲要預早訂嘅行程日子有局限，我哋冇得喺香川縣留咁耐。希望未來我哋可以再嚟香川縣玩啦。