NL MK: 友仔令和元年遊日本︰第七日

第一日	第二日	第三日	第四日	第五日
第六日	第七日	第八日	第九日	第十日
第十一日	第十二日	第十三日	第十四日	第十五日

第七日嘅相簿

再見，北九州！

喺「灯火」住咗五日四夜，今日終於都要走喇。有啲唔捨得，除咗呢個民宿幾舒服之外，屋主 Yassan 提供咗好多有用嘅資訊。大家如果想喺北九州搵住宿，不妨諗諗佢。呢度係「灯火」嘅 Facebook page，可以用英文同 Yassan 溝通。

有唔少民宿都有 guestbook 畀住客留言，我叫友仔喺入面寫啲嘢多謝 Yassan。我自己都寫咗啲嘢：

臨離開前，再去睇吓民宿入面掛出嚟嘅擺設。佢有幾張係介紹「灯火」嘅剪報、附近活動嘅單張同海報，不過今朝先發現有一張七十年代地圖：

好喇，夠鐘要走喇。不過走之前⋯⋯

量度吓民宿出面條馬路有幾斜先！😆

我係用手機量度斜度，「U17」係指佢向上傾斜 17°；我最初估佢有 30° 添！
其實，17° 算唔算好斜？不過我都幾肯定佢同扎山道嘅斜度有得比。

呢度咁斜，一定要靠 Yassan 車我哋落山，如果唔係點樣拖篋行落去？

喺小森江火車站前留影。

下一站︰四國！

我哋籌備旅行嘅時候，最初係諗住只係留喺九州玩，但搜集資料期間，我哋發掘唔到好多老少咸宜、我哋又未去過嘅景點；友媽喺我哋四年前去九州之前，曾經搵到過四國有麵包超人火車，我哋今次突然諗起呢樣嘢；於是，我哋轉 plan︰去四国（四國）！

九州同四國係兩個島，小森江並唔喺近四國嗰邊，要由小森江去四國，無論係坐船或者係火車，交通都頗為轉折。好在，現在有山陽、山陰、北部九州鐵路周遊券，雖然佢唔係為四國火車而設，但係佢包埋四國當中嘅宇多津同埋高松，啱晒我哋！

我哋要首先由小森江坐火車去小倉，然後轉新幹線去岡山，再轉快車去高松；噉樣坐法，大人超過 ¥12000！啱晒喇，我哋嗰張火車證大人係要 ¥22000 一張，呢一程，已經超過一半；再加上前幾日坐咗咁多次火車，應該抵晒😁！

我哋十一點幾離開小森江，需要喺去高松嘅路上食午餐，我哋諗住買便當。小倉站出面係一個商場，嗰度有一間超級市場，我哋喺嗰度買便當。

以後真係要記住唔好就噉喺火車站入面嘅便當店買便當，而係應該入超級市場買。
喺超級市場嘅便當，雖然未必係啲好高級嘅餸，但係價錢係便當店嘅一半。

我仲記得友媽喺第一次嚟日本時講過，喺日本坐火車要食吓便當先至夠 feel。

友仔成日問新幹線有幾快。就係咁快囉，差唔多每小時三百公里㗎。

我哋坐新幹線去到岡山就要轉車。

日本火車入面嘅告示都可愛過人。

我哋去四國，就要過瀬戸大橋（瀨戶大橋）。

喺我哋去轉火車期間，見到有一堆小朋友，我估佢哋大過友仔少少，但個個都孭個好鬼大嘅背囊😮︰

啲背囊闊過佢哋個身㗎！佢哋去 camp？係唔係學校活動？🤔

呢架就係我哋由岡山去高松嘅火車喇，有上下兩層㗎！友仔見到新款嘢又好興奮喇。

我喺小倉除咗買咗便當同飲品之外，仲買咗啲鯛魚燒添。不過，剛才嘅便當我哋食到好飽，啲鯛魚燒食唔晒。

咦？過緊瀨戶大橋喇！

瀨戶大橋同青馬大橋有樣嘢似，就係兩者都係行車鐵路兩用大橋；不過，瀨戶大橋鐵路嗰層唔係密封，火車乘客係可以望到個海；喺香港嘅青馬大橋就唔得喇。

兩點半過啲，我哋就嚟到高松。我哋喺呢度訂咗酒店。由火車站行去酒店，大概十分鐘左右。不過，我哋行緊嘅時候，太陽兜口兜面噉曬住，我哋流晒汗。

兩點十左右，嚟到酒店︰

可能因為天氣太熱，酒店為每個客人提供一樽水。

我哋去到嘅時候，仲未可以 check in，酒店職員幫我哋將行李臨時寄存，跟住諗住出去行吓；呢個時候友仔因小事而扭計，搞咗好耐都未掂，但我又需要返火車站搞埋四國嘅火車證，我惟有自己出去啦。我返到嚟，可以 check in 喇，不過見到條友好似仲係嬲爆爆噉。

不過上到房冇耐，冷靜咗咯喎，冇乜事喇，仲喺度跳嚟跳去添。