NL MK: 友仔令和元年遊日本︰第三日

第一日	第二日	第三日	第四日	第五日
第六日	第七日	第八日	第九日	第十日
第十一日	第十二日	第十三日	第十四日	第十五日

第三日嘅相簿

短遊福岡市

睇番我哋四年前嚟福岡住咗三晚（友媽第一日、第二日、第三日遊記），原來我哋係冇去過任何福岡市景點㗎！（唔係博多駅都算呀哇😅？）

尋晚食飯嗰陣諗︰今日我哋喺門司區嗰便晏晝四點先至可以 check in，不如我哋上晝喺福岡市搵地方行下啦。不過由於我哋事前計劃行程時主要係為咗日本工業文化遺產，冇乜留意過福岡市有乜地方好去，所以尋晚臨急臨忙去搵；最終，畀我搵到個博多町家ふるさと館（博多町家故鄉館）。

今朝起身，我哋做最後嘅執拾工作，食埋尋日食剩嘅炒麵，十點鐘左右就離開 apartment，行去博多火車站寄存行李。

喺市區可以聽到咁大聲嘅蟬鳴，香港現在仲有冇呢？下面齣片記得開聲睇︰

博多火車站有唔少投幣式儲物櫃，但係呢度超多人寄存行李，我哋算好彩喇，搵到兩個可以放得入我哋兩個篋同友仔「篋」嘅儲物櫃；不過，我哋揀到嗰啲只能夠狂入 ¥100 銀，友媽要嗱嗱淋走去搵地方「唱散銀」。

順帶一提︰有唔少遊客（世界各地都有）喺儲物櫃嗰度整理行裝，佢哋可唔可以事先整理好啲行李先至去用儲物櫃，或者拎咗篋之後去鬆動啲嘅地方先至整理呢🙄？

喺儲物櫃打完杖，就去預留新幹線指定席先。

如果係普通嘅九州周遊券，博多去小倉嘅新幹線係唔包嘅；不過因為我哋所用嘅係包埋山陰、山陽新幹線，所以我哋可以坐呢一程。

搞掂之後，我哋搭地鐵去中洲川端站，前往博多町家故鄉館，順便去行嗰頭嘅商店街︰川端通。

友媽話好鍾意行呢種街，尤其見到啲舊式招牌，好有感覺。

友仔喺地下見到啲麵包超人角色，又要影相。

（Sh… 我哋冇話佢知附近有個麵包超人博物館㗎，咁大個仔冇理由仲去呢個地方㗎哇？）

有啲舖頭為咗吸引中韓遊客，喺窗口貼咗「很多日本產品」作招徠︰

行完川端通，轉幾個彎，我哋就到咗博多町家故鄉館。

門口呢架人力車，友仔就好鍾意︰

但叫佢去後巷嗰啲舊式擺設度影相，佢就話唔制，因此就難得有友爸友媽雙人合照😆︰

不過友仔又會鍾意喺呢啲窿窿板度影相喎︰

展示館要收入場費，大人每人 ¥200，小朋友免費。

我最初有啲擔心友仔入到去會嗌悶，不過又唔係喎。

VR 對於小朋友嚟講係幾吸引嘅。

另外仲有「のぞきからくり」，我哋都覺得幾得意（網上搜尋到嘅 Youtube 片段，我哋自己冇影到）︰

樓上有更多舊嘢睇︰

友仔對呢個刨冰機好有興趣。

師傅即場示範整陶泥公仔︰

舊式家居擺設，大人就感興趣，友仔細個時都會鍾意睇，家下就麻麻地。

洗衫板，家下仲有幾多人用過呢？

展示館隔離係「町家棟」︰

有人即場示範紡紗︰

隔離有部織布機，學電腦嘅發展史一定會喺課本見過佢😆，因為嗰啲有窿仔嘅物體就係用嚟控制織布機織出嘅花紋。

中學生嘅書房︰

呢個井，打唔到水咯。

呢個博物館好快就行完，我哋行去附近嘅神社︰

友仔未入去就嗌悶要走🙄。雖然我都唔係太感興趣，不過仲有咁多時間剩，難得嚟到，冇理由唔入去睇㗎？

十二點九喇，我哋行番入川端通搵地方食晏。

呢間都ＯＫ喎︰

一點四就食完晏喇，仲有兩個幾鐘先搭火車，再喺川端通慢慢行啦；不過噉樣友仔係會嗌悶，好掃興嘅，所以又要靠「食」嚟引「吊命」。

刨冰嚟之前，一個悶樣︰

刨冰嚟到，精神晒！

呢間刨冰舖入面有個小型山笠。

食完刨冰，都仲有好多時間。慢慢行啦⋯⋯

沿途見到唔少 Les Misérables 嘅海報。
見到佢，我又諗起香港喇😔。

我見時間仲有好多，我提議行番去火車站。途中，我哋經過一個商場，友媽話係博多運河城（キャナルシティ博多／CANAL CITY HAKATA），好出名㗎。

我哋喺度借完廁所，我見到呢度有去「博多駅」嘅指示牌，於是我畀個任務友仔︰帶我哋返火車站。就係噉，友仔由死蛇爛鱔，變成行得最快嗰個😆。

可憐友媽話︰難得嚟到個大商場，都只係借廁所😭😭😭😭！

不過返到火車站，我哋仲有唔夠一個鐘頭，夠時間坐入間靚靚嘅 cafe 飲杯靚咖啡。

咖啡杯係有銅嘅顏色，好靚㗎。

價錢同連鎖咖啡店差唔多，但呢度靚好多。

歎完咖啡，我哋要返去儲物櫃度，先喺執緊嘢嘅遊客堆中殺出一條血路，噉先至可以攞番啲篋。

北九州市之旅，正式開始！

我哋嘅任務主要係喺北九州市探索工業遺產，所以我喺開始計劃旅行嘅時候就已經諗住喺北九州市逗留五日四夜。會唔會太多呢？我唔知，不過北九州市除咗工業遺產之外，應該都仲有其他嘢好睇嘅。

友仔成日都好想知新幹線可以開到幾快，呢張相應該可以畀到答案佢。

新幹線最高速度，係唔係 300 km/h 呢？我未證實。

去到小倉，我哋仲要轉區間火車。我哋嘅終點站，係小森江。

灯火 TOUKA

係時候要多介紹我哋搵到嘅住宿喇。

我哋四年前嚟過北九州市嘅門司港一次，所以對門司港比較熟悉，而搵住宿都係集中喺門司港附近，但係其實呢度住宿選擇唔多，最後我哋透過 Airbnb 搵到「A Little Guesthouse Touka 〜「灯火」灯台下のゲストハウス」呢間Ｂ＆Ｂ，我以下就簡稱佢做「灯火」啦。

「灯火」嘅位置比較偏僻，不過睇啲介紹好似好正噉。佢喺小森江火車站附近，距離門司港一個火車站。

我六月尾喺 Airbnb 搵到「灯火」時，循例問吓屋主（佢話我可以叫佢 Yassan）簡單問題，Yassan 回覆我之餘，仲話支持我哋香港人！嗰個時勢嘅香港，收到外國人對香港人嘅支持，我個心真係有啲感動！我就因為噉，確定預訂「灯火」。

「灯火」距離火車站大約七分鐘路程，但由於佢喺山上面，Yassan 話拎住行李行會有啲辛苦，所以佢係會喺小森江火車站接我哋。今日我喺福岡行街時，就一直係噉同 Yassan 聯絡，話佢知我哋會坐邊班火車，佢預時間落嚟火車站接車。

小森江火車站好簡陋，我哋落咗車之後，係要行落路軌先去到火車站出入口。我哋都未出火車站，已經見到一位男士向我哋揮手（我事先話過畀佢知我着乜嘢衫），佢就係 Yassan！佢同我哋打咗招呼，就即刻將我哋嘅行李搬上佢架車。

好在 Yassan 嚟接車咋！因為「灯火」所在位置條路真係好斜，佢將車泊入車房時，我感覺到架車係側向一邊，有啲擔心會翻車😅。

「灯火」並唔係一間可以畀我哋佔用晒所有設施嘅 apartment，友媽最初唔係咁想同人 share 浴室，不過我覺得好少可可以同 Airbnb 屋主傾到咁多句，所以我最終都揀咗佢，友媽都贊成。而事實上，「灯火」似乎呢幾日都只係得我哋一家人作客，所有設施都可以只係我哋用晒。