| 第一日 | 第二日 | 第三日 | 第四日 | 第五日 |
| 第六日 | 第七日 | 第八日 | 第九日 | 第十日 |
| 第十一日 | 第十二日 | 第十三日 | 第十四日 | 第十五日 |
 |
| 第十四日嘅相簿 |
民宿主人嘅咖啡店
今日我哋要離開別府喇。由於旅程規劃得唔係幾好，我哋好似唔係睇咗好多嘢噉；再加上尋日朝早未打完風，我感覺我哋喺別府好似留得特別短。
我哋喺別府嘅民宿主人係一個韓國人，佢喺民宿附近有一間咖啡店。由 Airbnb 個 app 度溝通所見，民宿主人都幾貼心，所以我哋諗住離開別府之前去一去佢間咖啡店打個招呼，順便食個早餐。
咖啡店唔係好大間，但係環境唔錯。
民宿主人仲會利用咖啡室去開一啲畀講唔同語言嘅人嚟交流嘅讀書會。我見到有幾個書櫃，擺咗幾種語言嘅書，其中我見到有日文聖經︰
友仔見到咖啡店牆上面有一啲客人嘅留言，佢又畫咗啲嘢貼上去。
 |
| 畫乜嘢呢？ |
 |
| 哦，浸溫泉！ |
 |
| 搵唔搵到友仔畫嗰張畫？ |
 |
| 友仔喺呢個別府地圖度貼咗啲嘢。 |
 |
| 原來係話自己喺呢個地方睇書！即係我哋尋日去動物園之前同之後留咗好耐嘅商場呀🤣。 |
我哋喺咖啡店嘅早餐︰
別了，別府
食完早餐，我哋返去民宿收拾行李。我同友仔都寫咗啲嘢喺民宿嘅 guestbook 度。
 |
| 睇唔睇得出友仔畫咗啲乜嘢？ |
差唔多十一點，要走喇。慶幸友仔好願意自己拎行李。
我哋下一站係由布院。本來我諗住坐火車去，不過民宿主人建議我哋坐巴士。
巴士經過一個山，馬路兩邊都係綠油油，望落好舒服。呢啲風景，令我諗起 Windows 98 嘅預設桌面背景🤣。
由別府去由布院，巴士車程大概一個鐘頭。
再遊由布院
我哋四年前第一次嚟日本都有去由布院，我覺得呢個地方好舒服，而嗰次我哋坐咗架靚火車「ゆふいんの森」（由布院之森），所以我選擇喺旅行嘅尾二嗰日再嚟呢個地方，而聽日就坐由布院之森返福岡，作為今次令和元年遊日本嘅終結。
我喺 Airbnb 預訂咗由布院火車站附近嘅一間旅館，不過我哋要到晏晝三點先至可以 check in，而我哋十二點就到咗由布院，所以我哋要喺火車站附近（亦係好近巴士總站）搵 locker 寄存行李。
四年前遊由布院嘅印象仲歷歷在目（睇呢度同呢度），基本上喺條街度行，我仲記得上次去過邊度。
友仔四年前都有同呢啲麵包超人影相︰
我哋亦喺呢度食過雪糕。友媽仲買咗啲唔同種類嘅蜜糖帶番香港用。
上次我哋都有見到呢間餐廳，不過就冇入過去。今次我哋就喺度食晏晝飯啦，雖然⋯⋯有啲貴。
啲蛋包飯整得幾別緻︰
友仔今餐食得好唔專心，因為餐廳部電視不斷 loop 住 Charlie Brown 卡通片，友仔睇到目不轉睛。
由於呢間餐廳一啲都唔平，我哋三個人只叫咗一杯飲品，幾好飲㗎。
食完飯，我哋繼續行，不過如果只係行街睇嘢，友仔一定會唔耐煩，所以我哋又入咗湯布院昭和館。今次感覺唔同啲嘅，上次入去時係平成時代，昭和係上一代日皇；今次係令和，昭和變咗係前兩代嘞。
博物館，友仔一定啱啦，況且入面有好多展品都可以畀人玩。
課室︰
商店︰
診所︰
玩具︰
澡堂︰
家居︰
上次係友爸友媽喺呢度睇咗好耐，今次對於我哋嚟講就少咗份新鮮感，睇咗唔夠一個鐘。
跟住，去邊好呢？我哋見到一個有好多舊車展出嘅博物館，友媽覺得友仔應該幾有興趣，於是就叫咗我帶友仔入去，友媽自己繼續行街。
友仔對上面啲車其實唔係咁感興趣，只係喺呢個火車模型睇咗幾長時間。
呢個博物館比起昭和館就差得遠，我覺得佢只係將一堆舊車放埋一齊，我哋睇咗唔夠十五分鐘就走番出去搵友媽。
友媽行咗一陣，就入咗呢間嘢食雪糕，我哋當然都食埋一份。
已經過咗三點喇，可以去旅館 check in 喇，回程先。
咦？今次又畀我哋撞正夜市😃？好，今晚又走出嚟趁吓熱鬧先。
咦？仲有呢個麵包超人角色冇影過喎！
我哋返到去火車站附近寄存行李嘅地方，友仔又發現咗啲有趣嘅嘢。
拎番啲行李，可以去旅館 check in 喇。我對呢間旅館好有期望，因為我記得由布院係比較鄉郊嘅地方，我特登揀咗一間離火車站唔遠、但又夠僻靜嘅地旅館入住，俾我哋可以享受呢個地方嘅寧靜。仲有，睇網站嘅介紹，呢間旅館可以住十個人以上，但今晚只有我哋一家三口住晒！本來，呢個地方租金唔貴，不過清潔費唔平；由於我哋只係住一晚，所以變相租金唔平。就係因為租金唔平，我對呢間旅館有相當高嘅期望。
話就話火車站附近，但原來拖住篋，要行一啲唔多平嘅路，我哋要差唔多行成十五分鐘，友媽話都幾辛苦😰。
到喇！
哇！果然冇令我失望！旅館好大呀，設備都好新！
沖涼地方可以浸溫泉︰
唔只，旅館仲有一個戶外浸溫泉嘅地方，係我哋專用😃！
今晚同聽朝可以盡情噉浸咯！
旅館附近大部份地方都係農田，風景好靚。
旅館嘅位置，係我哋上次未行過嘅，所以我哋安頓好之後再出去周圍行吓。原來，呢度都算係幾方便喎，有幾間食肆，亦有便利店，搵食都唔係太困難。
喺火車站附近嘅環境都唔錯。
 |
| 聽到呢啲火車駛近平交路嘅「噹、噹」聲，感覺好治癒。 |
因為我哋今晚諗住出去夜市掃街，所以我哋只係喺便利店買咗少少嘢食就算。我哋一於浸一次溫泉，先至出去夜市。
友媽去浸先，但佢話唔知點樣去調較水溫。呢一刻我先至知道，原來浸戶外溫泉都可以調較水溫。
 |
| 友媽唔係好識搞呢兩個水掣。 |
 |
| 呃⋯⋯有指定睇㗎喎。 |
友媽浸完，到友爸友仔。友仔玩得好開心呀。
浸住溫泉，望住出面嘅山，好舒服！租金雖然貴，但都抵番晒！
無心插柳之四︰由布院夜市
今次我哋只係留喺由布院一晚，都畀我哋遇啱係夜市，真係好彩！
四年前雖然我哋都見過流水麵，但今次見到，我哋都覺得好新鮮。只不過，友爸友媽以為友仔會好想試，點知唔係喎；結果，我哋兩次見過呢樣嘢，都係冇試過。
我哋只係喺呢度買咗啲小食同埋飲品。
今次都係有人又唱又跳︰
我以為友仔會有興趣睇，但可能因為啲人嘅裝扮唔係咁靚，友仔唔係好想睇。
今次個夜市似乎規模冇上次咁大，八點半啲人就跳完舞嘞。我哋都隨即返旅館休息。
難得可以嚟到咁少光害嘅地方，又咁啱今日係七夕，我走咗出旅館睇星。本來我又想影吓星，不過由於器材唔專業，我搞咗好耐都係影唔到嘢😞。
喺我返入旅館之際，畀我見到一樣友媽好唔鍾意、但友仔應該會好感興趣嘅嘢︰
聽晚，我哋就要返香港喇。時間過得真係快，噉就兩個禮拜喇。
No comments:
Post a Comment