NL MK: 友仔令和元年遊日本︰第四日

第一日	第二日	第三日	第四日	第五日
第六日	第七日	第八日	第九日	第十日
第十一日	第十二日	第十三日	第十四日	第十五日

第四日嘅相簿

早晨🌅！

「灯火」係Ｂ＆Ｂ，即係佢包埋早餐。

Yassan 話八點就有早餐，友仔起咗身之後，一到八點就走去 pantry 咯，不過只係飲咗杯奶（Yassan 倒咗杯奶畀佢，呢啲包佢自己唔會主動整嚟食），佢主要嘅目的，就係玩 Yassan 擺喺餐枱上面嘅小玩具😆。

我哋食完早餐，返房執好啲嘢，預備今日嘅行程。突然發現︰我今次旅行用咗好多捐血得嚟嘅贈品。

開工！

今日我哋嘅任務，就係去造訪同馬鞍山鐵礦最有關係嘅八幡製鐵所（八幡製鉄所）。喺五十年代，日本嘅八幡製鉄所為馬鞍山嘅鐵礦場提供先進嘅採礦技術，而採到嘅鐵礦會送嚟日本鍊鋼。

出門開工！

要去八幡製鐵所，我哋需要坐火車去一個叫做「スペースワールド」嘅火車站，佢嘅英文名係「Space World」，完全冇漢字名，喺火車上面嘅報站系統係只會有日文，噉樣對我呢個完全冇認過日文字母嘅人嚟講，要知道幾時落車係幾有難度。要知道幾時落車，Yahoo!乗換案内呢個 app 就大派用場，我可以睇住佢而知道我去到邊個站。

有驚無險，平安嚟到 Space World 站。

呢個站叫做「Space World」，係因為附近有一個叫做「Space World」嘅主題公園。不過，呢個站唔係好多人落車嘅？今日係星期日喎，唔通呢個主題公園唔好玩？

落咗車，我第一眼見到嘅唔係主題公園，而係呢樣嘢︰

我最初以為佢就係現在嘅八幡製鐵所嘅鍊鋼廠，後來再檢查一下自己搵過嘅資料，佢原來都係一個日本工業歷史遺跡，英文名係 Higashida Daiichi Blast Furnace（因為我一直都係用緊英文系統，我未留意到佢嘅日文名、中文名叫乜），即係乜嘢嚟呢？

由於要交功課，我一落車就係噉拍片。呢個時候發生咗個小意外︰我哋一直都用一個膠袋裝住「小饅」，喺我拍緊片嘅時候，小饅係拎咗出嚟，膠袋就噉放咗喺一張凳上面；呢個時候有一陣風吹走個膠袋落路軌，友仔好緊張，似乎要去執番！佢噉樣就輪到我同友媽好緊張，因為友仔覺得有嘢跌咗唔執番係唔得嘅；我哋急忙要安慰佢。呢個時候，又係見證到日本人嘅敬業樂業精神︰喺一架火車開出咗之後，有一個車站職員用工具夾番起個膠袋，畀番我哋，呢個職員應該係見到友仔好緊張想喊嗰個樣。呢種工作態度，我哋真係要好好學習。

八幡製鉄所

嚟日本之前已經知道，八幡製鐵所冇得入內參觀，我哋以為火車站附近唔會有乜指示，點知⋯⋯

大大隻字，清晰指示。

有地圖教埋你點去。

地面都有指示！

行到上一條行人天橋，我哋見到係咁嘅環境︰

睇 360 照片會見到更多範圍︰

嗰大笪空地，好似就係 Space World？唔怪得火車站咁少人落車啦，原來個主題公園已經冇咗。

行人天橋繼續有指示，真係唔駛驚會盪失路︰

過埋條天橋，行入一條行人隧道，開始見到好多有關八幡製鐵所嘅資料︰

到入口喇，嗰度有一位姨姨企喺烈日之下指示參觀者入去。

入到去之後，有幾位工作人員為參觀者講解，同時亦有好多資料睇︰

睇睇友仔帶我哋嚟睇八幡製鐵所嘅資料︰

咦？呢個就係我哋喺火車站見到嗰個「Blast Furnace」喎！佢原來叫做「東田第一高炉」（東田第一高爐），似乎佢同八幡製鐵所都有啲關係喎，一陣返去火車站時去睇睇先。

呢個貯水池似乎都係景點喎，不過遠咗啲，唔順路😕︰

我哋見到除咗我哋之外，仲有幾位參觀者，不過似乎都係日本人，好似我呢啲外國遊客好少。負責講解嘅伯伯似乎只能夠用日文同參觀者講解，另外有一位姨姨就嘗試用另外一種方法招呼我哋︰拎部平板電腦嚟播 360 影片︰

呢個地方最主要嘅景點係八幡製鐵所嘅「旧本事務所」（前總部），即係相中紅色建築物︰

好可惜，唔知係唔係因為佢喺度裝修緊，我哋係冇得入去睇（唔怪得姨姨畀我哋睇 360 影片啦），而其實呢個前總部都距離我哋幾遠㗎，唔怪得呢個地方嘅正確名稱係「官営八幡製鐵所旧本事務所眺望スペース」啦😂！撳入下面嘅 360 照片睇睇︰

吖⋯⋯小饅要返工先得喎︰

我哋睇到啲展板，似乎冇提及過香港或者馬鞍山；作為鞍山探索館大使，梗係要同啲工作人員提及一下喺上世紀五十年代，香港嘅馬鞍山有鐵礦運嚟呢度鍊鋼啦︰

十二點喇，係時候要走，因為我哋安排咗友仔下晝去一個佢好鍾意嘅博物館，遲咗去佢會唔夠時間睇，何況我哋仲要去食晏。

走嘅時候，拍齣片講下感受先︰

又係 Aeon Mall？

「官営八幡製鐵所旧本事務所眺望スペース」呢頭冇乜地方食嘢，我哋行番去火車站會容易啲搵。

我哋又見到一個好靚嘅坑渠蓋喇︰

行番去火車站有乜地方食嘢？Aeon Mall 啦！

似乎，喺啲比較偏僻嘅博物館附近都可以搵到 Aeon Mall。

我哋喺呢度嘅美食廣場食飯（呢度都幾多人㗎），之後就去下一個景點。呢個地方，友仔必定會唔捨得走。

北九州市立いのちのたび博物館

友仔見到呢個地方，基本上係唔理阿爸阿媽，自己行入去。睇睇下面齣片︰

呢個地方叫做「北九州市立自然史、歷史博物館」︰

友仔咁興奮，係因為呢期嘅專題展覽係兩棲類同爬蟲類︰

我哋買咗飛睇晒常設展覽同專題展覽，大人 ¥1200，小學生 ¥600。

唔駛問，啲兩棲類同爬蟲類，友仔梗係睇得好開心啦，連啲標本同骷髏骨都啱︰

去到常設展廳，友仔見到啲恐龍骨一樣咁興奮︰

哇，呢隻龜條頸咁長嘅？

仲有好多嘢睇，我都冇影到相。友媽行到有啲攰，佢就坐喺有得買嘢飲嘅地方休息，友仔飲完嘢就由我帶住睇埋其他展品。

睇完自然史展品，跟住就睇歷史展品，不過對友仔嚟講冇咁吸引。

又喺呢種板到要影相🙄？

歷史展品其實都幾豐富，不過的確對於小朋友嚟講冇咁吸引嘅︰

咦？呢個同「八幡製鐵所」有啲關係喎。

嚟到八襎呢個地方，似乎除咗呢個博物館之外就冇乜紀念品賣嘞，所以友媽喺度搵紀念品︰

呢本書可能對於鞍山探索館有啲用。

咦？呢款朱古力好有趣喎！不過幾貴喎。

三點九左右，我哋離開博物館。

東田第一高炉

博物館出面嘅停車場，有個牌展示咗附近所有世界遺產。

東田第一高爐係免費參觀。佢喺一個咁開放嘅地方，我哋以為可以任何時間都入得去參觀；原來唔係㗎，佢五點就閂閘㗎喇！好在友仔啱啱喺博物館唔係睇到閂門😅，如果唔係，我哋出到嚟都冇得入去東田第一高爐喇。

好在我哋嚟得到咋，我哋係可以親自行埋上去個爐，近距離咁睇︰

送風嘅喉管直徑仲高過友仔︰

每個部份都有詳細介紹，雖然以日文為主，但都勉強睇得明︰

運鐵礦嘅火車？

友仔帶大家上埋樓上參觀：

呢度可以睇到提鍊出嚟嘅鋼水會點樣處理：

睇呢個表，我哋估計上世紀五十年代八幡製鐵所係有用呢個高爐鍊鋼嘅。呢個爐喺 1901 至 1972 年期間運作。

繼續行去睇埋高爐嘅主要部份：

友仔再帶大家去另一邊睇下有乜嘢睇：

友仔行咁耐都攰喇，跟住就等我去埋剩低嘅地方啦：

又再搵小饅返工先：

要睇晒成個場，要用幾張 360 照片先得：

我哋趕得及喺五點閂門前離開，仲可以去隔離好大間嘅運動舖，等友媽滿足一下購物嘅欲望。（不過，好似受惠嘅係友仔同友爸😂。）

再次無心插柳

Yassan 尋晩話我知，前日、尋日同今日係「戸畑祇園大山笠」（戶畑祇園大山笠）祭典舉行嘅日子，呢個祭典係日本嘅非物質文化遺產，戶畑喺小倉附近，好容易去到。既然今日任務完成，夜晚又冇諗過要做乜嘢，不如就過去戶畑睇下啦。

火車站嘅圖案係山笠形狀

喺火車上面，有唔少人着咗浴衣，佢哋都係喺戶畑落車。

火車站出面有祭典嘅海報。

我哋淨係知道要坐火車嚟戶畑，但係唔知道喺邊個位置舉行，網站亦冇講。咁，火車站出面張地圖呢？

其實，睇地圖都唔知佢噏乜，不如都係跟住其他人行啦，我哋估佢哋都係去睇祭典啩。

跟住佢哋行，應該啱喇啩？

其實，呢個時間應該食晚飯，不過我哋見行行下見到有小食埋，我哋估喺街上面一定會有好多小食賣，不如今晚就掃街啦！

我哋似乎喺條商店街度行緊。呢個入口嘅街名轉咗上去，係唔係要畀山笠過呢？

繼續去掃街！

哇，好似「貢茶」噉喎。不過我哋冇買嚟飲。

日本總係會有呢種有啲虐待金魚嘅嘢玩🙄。

行行下，我哋上咗去個空地。

有大叔大媽好 rock 噉唱歌：

同唔同喺香港街頭見到嗰啲？🤔

佢哋應該唱得唔差，不過實在太大聲，我哋走到隔離嘅球場迴避一下。

我哋坐到太陽落山，唔對路喎，下面掃街啲檔口仲喺度開緊（雖然啲檔口寫住十點就收），條街依然好多人行緊但係掃緊街，個廣場唔似有人會抬山笠出嚟；到底今晚有冇得睇㗎？定係今晚大家只係志在掃街，山笠就噉擺出嚟畀人影相🙄？

我哋所在嘅球場其實有唔少人，不過可能我哋個樣太似遊客喇，有當地人走嚟同我哋講︰「It start now. Go, it is night.」相信佢估到我呢家遊客嚟戶畑應該就係要睇山笠祭典，但唔知頭唔知路走咗上嚟球場，所以出於好意提我哋走番落去睇。

即使係噉，我哋落番去條街度，見到啲人都係掃街，唔似會有人抬山笠嘅？唔通要等到十點啲檔口收晒先開始？友仔捱唔到咁夜㗎喎！

友仔悶咗好耐喇，要買啲刨冰、朱古力蕉食吓︰